രൂപതാദിനാഘോഷം, കേരള സഭാനവീകരണത്തിന് രൂപതയില്‍ തിരി തെളിഞ്ഞു
ഇരിങ്ങാലക്കുട: രൂപത, ഇടവക, കുടുംബ തലങ്ങളില്‍ ആധ്യാത്മിക നവീകരണത്തിനു ഒറ്റക്കെട്ടായി അണിനിരക്കുകയെന്ന ആഹ്വാനത്തോടെ ഇരിങ്ങാലക്കുട രൂപതയില്‍ ‘കേരളസഭാ നവീകരണ’ കാലഘട്ടത്തിനു തുടക്കം. ഇരിങ്ങാലക്കുട രൂപതയുടെ 45 ാം രൂപതാദിനത്തോടനുബന്ധിച്ചു ഇരിങ്ങാലക്കുട സെന്റ് തോമസ് കത്തീഡ്രലില്‍ നടന്ന ചടങ്ങില്‍ ഇരിങ്ങാലക്കുട രൂപതയിലെ നവീകരണ പ്രവര്‍ത്തനങ്ങളുടെ ഉദ്ഘാടനം മാര്‍ പോളി കണ്ണൂക്കാടന്‍ നിര്‍വഹിച്ചു. സാര്‍വത്രിക സഭയില്‍ ഫ്രാന്‍സിസ് പാപ്പ പ്രഖ്യാപിച്ച സിനഡാത്മകതയിലൂന്നി കേരള കത്തോലിക്കാസഭയില്‍ ആരംഭിച്ചിട്ടുള്ള നവീകരണത്തിനാണ് ലോഗോ പ്രകാശനം ചെയ്ത് രൂപതാദിനത്തില്‍ തുടക്കം കുറിച്ചത്. ‘സഭ, ക്രിസ്തുവില്‍ പണിയപ്പെട്ടുകൊണ്ടിരിക്കുന്ന ഭവനം’ എന്നതാണ് നവീകരണത്തിന്റെ ആപ്തവാക്യം. രൂപതയിലെങ്ങും കൂട്ടായ്മയും പ്രേഷിതാഭിമുഖ്യവും വളര്‍ത്തി സമകാലിക സമൂഹത്തില്‍ ക്രിസ്തുവിന്റെ യഥാര്‍ഥ സാക്ഷികളാകുവാന്‍ സഭാംഗങ്ങളെ പ്രാപ്തരാക്കുകയാണ് നവീകരണത്തിന്റെ ലക്ഷ്യമെന്ന് ബിഷപ് മാര്‍ പോളി കണ്ണൂക്കാടന്‍ പറഞ്ഞു. ഇരിങ്ങാലക്കുട സ്പിരിച്വാലിറ്റി സെന്ററില്‍ നടന്ന സമൂഹബലിയോടെയായിരുന്നു രൂപതാദിന ആഘോഷങ്ങളുടെ തുടക്കം. രൂപതയിലെ വൈദികര്‍, സന്യസ്തര്‍, പാസ്റ്ററല്‍ കൗണ്‍സില്‍ അംഗങ്ങള്‍, ഇടവക പ്രതിനിധികള്‍ തുടങ്ങിയവര്‍ പങ്കെടുത്തു. രൂപതാദിന സമ്മേളനത്തില്‍ ബിഷപ് മാര്‍ പോളി കണ്ണൂക്കാടന്‍ അധ്യക്ഷത വഹിച്ചു. സുവര്‍ണ ജൂബിലിയിലേക്ക് അടുത്തുകൊണ്ടിരിക്കുന്ന രൂപതയുടെ ചരിത്രത്തിലെ സുപ്രധാന നിമിഷമാണ് 45 ാം രൂപതാദിനമെന്നും 2050 ല്‍ രൂപതയിലെ ക്രൈസ്തവ ജീവിതം എങ്ങനെയായിരിക്കണമെന്ന സ്വപ്നം മനസിലുയരേണ്ട നിര്‍ണായക ചരിത്ര മുഹൂര്‍ത്തമാണിതെന്നും ബിഷപ് പറഞ്ഞു. വൃക്കദാനം നടത്തിയ കനകമല തീര്‍ഥകേന്ദ്രം റെക്ടര്‍ ഫാ. ഷിബു നെല്ലിശേരിയെ മാര്‍ പോളി കണ്ണൂക്കാടന്‍ പൊന്നാടയണിയിച്ച് ആദരിച്ചു. വികാരി ജനറാള്‍ മോണ്‍. ജോയ് പാലിയേക്കര ആമുഖസന്ദേശം നല്‍കി. വികാരി ജനറാള്‍മാരായ മോണ്‍. ജോസ് മാളിയേക്കല്‍, മോണ്‍. ജോസ് മഞ്ഞളി, കത്തീഡ്രല്‍ വികാരി ഫാ. പയസ് ചെറപ്പണത്ത്, നവീകരണ സംരംഭങ്ങളുടെ രൂപതാതല കണ്‍വീനര്‍ ഫാ. നിക്‌സന്‍ ചാക്കോര്യ, സിഎംസി പ്രൊവിന്‍ഷ്യല്‍ സിസ്റ്റര്‍ വിമല, പാസ്റ്ററല്‍ കൗണ്‍സില്‍ സെക്രട്ടറി ടെല്‍സണ്‍ കോട്ടോളി, രൂപത മാതൃസംഘം പ്രസിഡന്റ് ബേബി പൗലോസ്, ചാന്‍സലര്‍ റവ. ഡോ. നെവിന്‍ ആട്ടോക്കാരന്‍ എന്നിവര്‍ പ്രസംഗിച്ചു.
About Author
കരൂപ്പടന്ന എന്‍എസ്എസ് വളണ്ടിയര്‍മാര്‍ പല്ലൊട്ടി സിനിമയുടെ അണിയറ പ്രവര്‍ത്തകരുമായി സംവദിച്ചു 
വാര്‍ഡ് വിഭജനം; കരട് വിജ്ഞാപനമായി; ഇരിങ്ങാലക്കുട നഗരസഭയില്‍ ഇനി 43 വാര്‍ഡുകള്‍ 
കരുതിയിരിക്കുക, ഓണ്‍ലൈന്‍ തട്ടിപ്പുകളില്‍ വീഴരുതേ……ആദ്യം ഫോണ്‍ വിളി, താങ്ങളുടെ പേരില്‍ ക്രൈം കേസുകളുണ്ടെന്നു മുന്നറിയിപ്പ് 
നവീകരിച്ച ഇരിങ്ങാലക്കുട ക്രൈസ്റ്റ് ആശ്രമദേവാലയത്തിന്റെ വെഞ്ചിരിപ്പ് നിര്‍വഹിച്ചു 
ടൗണ്‍ അമ്പ് ഫെസ്റ്റ് 2025 സ്വാഗത സംഘം ഓഫീസ് ഉദ്ഘാടനം ചെയ്തു 
ക്രൈസ്റ്റ് ആശ്രമ ദേവാലയത്തില്‍ ക്രിസ്തുരാജന്റെ തിരുനാളിന് കൊടിയേറി 
