ദേശീയ താരം മീരക്കു പഠനത്തിലും ഫുള്‍മാര്‍ക്ക്

1200 ല്‍ 1200 മാര്‍ക്കു നേടി മീര ഷിബു
ഹയര്‍ സെക്കന്‍ഡറി പരീക്ഷയില്‍ 1200 ല്‍ 1200 മാര്‍ക്കു നേടി ഇരിങ്ങാലക്കുട നാഷണല്‍ ഹയര്‍ സെക്കന്‍ഡറി സ്‌കൂളിലെ മീര ഷിബു. ഹയര്‍ സെക്കന്‍ഡറി കൊമേഴ്‌സ് വിഷയമാണു മീര ഷിബു പഠിച്ചത്. വെള്ളാനി വടക്കേത്തല വീട്ടില്‍ ഷിബു ആന്റണിയുടെയും സരിതയുടെയും മകളാണ്. ഹൈജംപ, ട്രിപ്പിള്‍ ജംപ് എന്നീ ഇനങ്ങളില്‍ ദേശീയ തലത്തില്‍ മെഡല്‍ നേടിയിട്ടുണ്ട്. ആന്ധ്രയിലെ ഗുണ്ടൂരില്‍ നടന്ന ജൂണിയര്‍ നാഷ്ണല്‍ മീറ്റില്‍ ഹൈജംപില്‍ 18 വയസിനു താഴെയുള്ള പെണ്‍കുട്ടികളുടെ വിഭാഗത്തില്‍ സ്വര്‍ണം നേടിയിരുന്നു. കര്‍ണാടകയിലെ ഉഡുപ്പിയില്‍ നടന്ന സൗത്ത് സോണ്‍ അത് ലറ്റ് മീറ്റില്‍ ഹൈജംബില്‍ രണ്ടാം സ്ഥാനവും നേടിയിരുന്നു. റിലയന്‍സ് യൂത്ത് മീറ്റിലും പങ്കെടുത്ത് ഹൈജംബില്‍ ഒന്നാം സ്ഥാനം നേടിയിരുന്നു. മഹാരാഷ്ട്രയിലെ പൂനെയില്‍ നടന്ന ഖേലോ ഇന്ത്യ നാഷ്ണല്‍ മീറ്റിലും റാഞ്ചിയില്‍ നടന്ന ജൂണിയര്‍ നാഷണല്‍ മീറ്റിലും പങ്കെടുത്ത് മെഡലുകള്‍ നേടിയിട്ടുണ്ട് ഈ താരം. ഇന്ത്യയെ പ്രതിനിധീകരിച്ച് മത്സരത്തില്‍ പങ്കെടുക്കണമെന്നാണു ആഗ്രഹം. ട്യൂഷന്‍ എന്തെന്നു പോലും മീരക്കു അറിയില്ലെന്നാണു പിതാവ് ഷിബു പറയുന്നത്. നാഷണല്‍ സ്‌കൂളില്‍ തന്നെ പഠിക്കുന്ന സെബാസ്റ്റ്യന്‍ ഷിബു സഹോദരനാണ്.

About Author

ijknews

See author's posts