ഇത്തിരി സ്ഥലം വേണം കുഞ്ഞോമനകള്‍ക്ക് പാറിനടക്കാന്‍…
വാടക കെട്ടിടത്തില്‍ പ്രവര്‍ത്തിക്കുന്ന പൊറത്തിശേരി പുറത്താട്ട് വാര്‍ഡിലെ അങ്കണവാടി.
നഗരസഭയിലെ 11 അങ്കണവാടികള്‍ വാടക കെട്ടിടത്തില്‍
കഴിഞ്ഞ അഞ്ച് വര്‍ഷത്തിനുള്ളില്‍ നവീകരിച്ചത് 24 അങ്കണവാടികള്‍
ഒരു അങ്കണവാടി പോലും സ്മാര്‍ട്ടല്ല
ഇരിങ്ങാലക്കുട: ഈ കുഞ്ഞുമക്കളെയും കൊണ്ട് ഞങ്ങളെവിടെ പോകാനാണ്?- ഇരിങ്ങാലക്കുടയില്‍ സ്വന്തമായി സ്ഥലമില്ലാത്ത അങ്കണവാടിയിലെ ജീവനക്കാര്‍ ചോദിക്കുന്നു. നഗരസഭയില്‍ 41 വാര്‍ഡുകളിലായി 60 അങ്കണവാടികളാണുള്ളത്. എന്നാല്‍, ഇതില്‍ സ്വന്തമായി സ്ഥലവും കെട്ടിടവുമില്ലാതെ വാടക കെട്ടിടത്തില്‍ പ്രവര്‍ത്തിക്കുന്നത് 11 അങ്കണവാടികളാണ്. ഇവയില്‍ പലതും ഒറ്റമുറി കെട്ടിടത്തിലോ, തകരഷീറ്റിട്ട കെട്ടിടത്തിലോ ആണ്. ബൃന്ദ, വിജയ്, നൈവേദ്യ, കേരള പിറവി സുവര്‍ണ ജൂബിലി, സ്‌നേഹതീരം, ചൈതന്യ, നവജ്യോതി, ഗുരുകുലം, കാരുകുളങ്ങര, ശാന്തിനഗര്‍, സിവില്‍ സ്റ്റേഷന് എന്നീ അങ്കണവാടികളാണ് വാടക കെട്ടിടത്തില്‍ പ്രവത്തിക്കുന്നത്.
എപ്പോള്‍വേണമെങ്കിലും ഒഴിഞ്ഞുപോകേണ്ടിവരുമെന്ന ആശങ്കയിലാണ് ഇവിടെ പഠനം. എല്ലാ അങ്കണവാടികള്‍ക്കും സ്വന്തമായി കെട്ടിടം നിര്‍മിച്ചുനല്‍കുന്ന പദ്ധതിക്ക് സര്‍ക്കാര്‍ തുടക്കമിട്ടിട്ടുണ്ടെങ്കിലും സ്ഥലം ലഭ്യമാക്കാന്‍ കഴിയാത്തതാണ് തിരിച്ചടിയാകുന്നത്. വകുപ്പ് അനുവദിക്കുന്ന ചെറിയ തുകയ്ക്ക് സ്ഥലം കണ്ടെത്താന്‍ നഗരസഭക്ക് കഴിയുന്നില്ല. മൂന്ന് സെന്റ് ലഭിച്ചാല്‍ മാത്രമേ അവശ്യസൗകര്യങ്ങളോടെ അങ്കണവാടിക്കെട്ടിടം പണിയാനാകു. ഐസിഡിഎസിന്റെയോ തദ്ദേശസ്ഥാപനത്തിന്റെയോ എംഎല്‍എയുടെയോ എംപിയുടെയോ വികസനപദ്ധതികളില്‍ നിന്നുള്ള തുക കെട്ടിടത്തിന്റെ നിര്‍മാണത്തിന് കണ്ടെത്താനാകും.
കുഞ്ഞുങ്ങളുടെ ആരോഗ്യപരിപാലനം, പ്രതിരോധ കുത്തിവെപ്പുകള്‍, പോഷകാഹാരം ഉറപ്പാക്കല്‍, പ്രാഥമിക ബാലപാഠം, അമ്മമാരുടെയും ഗര്‍ഭിണികളുടെയും ക്ഷേമം തുടങ്ങിയ പ്രവര്‍ത്തനങ്ങളാണ് അങ്കണവാടികള്‍ നടത്തുന്നത്. ഇതിനാവശ്യമായ കെട്ടിടം, കളിസ്ഥലം, പ്രാഥമികസൗകര്യം, സുരക്ഷിതമായ ചുറ്റുപാട് എന്നിവ പല വാടക കെട്ടിടങ്ങളില്‍ ഉണ്ടാകാറില്ല. മഴ പെയ്യുന്ന സമയത്ത് കുട്ടികളെ പുറത്തിറക്കിക്കൊണ്ടുപോകുക വലിയ പ്രയാസമാണ്. അടിസ്ഥാന സൗകര്യങ്ങളില്ലാത്തതിനാല്‍ ഇത്തരം അങ്കണവാടികളില്‍ ഓരോ വര്‍ഷവും കുട്ടികളുടെ എണ്ണവും കുറയുകയാണ്.
എട്ടാം വാര്‍ഡിലെ ലക്ഷ്മി, 34-ാം വാര്‍ഡിലെ ഇ.കെ. നായനാര്‍ സ്മാരകം എന്നീ അങ്കണവാടികളില്‍ ആണ് ഏറ്റവും കൂടുതല്‍ കുട്ടികള്‍ പഠിക്കുന്നത്. 18 കുട്ടികള്‍ വീതമാണ് ഇവിടെയുള്ളത്. ഏറ്റവും കുറവ്കുട്ടികളുള്ളത് വാര്‍ഡ് 33 ല്‍ സുവര്‍ണ്ണദീപം അങ്കണവാടിയിലാണ്. നാലു പേര്‍ മാത്രമാണിവിടെയുള്ളത്. കഴിഞ്ഞ അഞ്ച് വര്‍ഷത്തിനുള്ളില്‍ 24 അങ്കണവാടികള്‍ നവീകരിക്കാനയത് ഏറെ നേട്ടം തന്നെയാണ്. എന്നാല്‍ നഗരസഭയില്‍ ഒരു അങ്കണവാടി പോലും സ്മാര്‍ട്ടല്ല.
About Author
ഇരിങ്ങാലക്കുട ജുഡീഷ്യല്‍ മജിസ്‌ട്രേറ്റ് കോടതി തകര്‍ന്നു വീഴാറായ കെട്ടിടത്തില്‍ 
ക്രൈസ്റ്റ് കോളജ് എന്‍എസ്എസ് യൂണിറ്റ് എയ്ഡ്‌സിനെതിരെ ബോധവത്കരണ റാലിയും ഫ്‌ലാഷ്മോബും സംഘടിപ്പിച്ചു 
ജനറല്‍ ആശുപത്രിയിലെ മതിലിന്റെയും ഗേറ്റ് വേയുടെയും നിര്‍മാണം ആരംഭിച്ചു 
പോലീസുദ്ദ്യോഗസ്ഥന്റെ ഡ്യൂട്ടി തടസ്സപ്പെടുത്തി; സ്റ്റേഷന് റൗഡി അറസ്റ്റില്‍ 
സെന്റ് ജോസഫ്‌സ് കോളജില്‍ സാമ്പത്തികശാസ്ത്ര വകുപ്പ് അസോസിയേഷന്‍ ഉദ്ഘാടനം 
തൃശൂര്‍ റൂറല്‍ ജില്ലാ പോലീസ് ഓഫീസിനു കീഴിലുള്ള ഏഴു പോലീസ് ഉദ്യോഗസ്ഥര്‍ക്ക് മുഖ്യമന്ത്രിയുടെ പോലീസ് മെഡല്‍ പുരസ്‌കാരം 
