എങ്ങുമെത്താതെ പടിയൂര്‍ പഞ്ചായത്തിലെ മാരാംകുളം കുടിവെള്ളപദ്ധതി !!

November 12, 2021

Social media

ജലഅഥോറിറ്റിക്ക് നല്‍കിയ ഫണ്ട് ജില്ലാ പഞ്ചായത്ത് തിരിച്ചെടുത്തു
തുക തിരിച്ചെടുത്തത് 2018 ല്‍
ഗ്രാമപഞ്ചായത്ത് വിവരം അറിഞ്ഞത് അടുത്ത കാലത്തെന്ന് പ്രസിഡന്റ്
പദ്ധതി ജോലികള്‍ മുടങ്ങിയിട്ട് 13 വര്‍ഷം
പടിയൂര്‍: പഞ്ചായത്ത് തെക്കന്‍ മേഖലയിലെ കുടിവെള്ളപ്രശ്‌നം പരിഹരിക്കുന്നതിനായി ആരംഭിച്ച മാരാംകുളം കുടിവെള്ള പദ്ധതി എങ്ങുമെത്തിയില്ല. 2005-06 വാര്‍ഷിക പദ്ധതിയിലുള്‍പ്പെടുത്തിയാണു ജില്ലാ പഞ്ചായത്ത് മാരാംകുളത്തിനു സമീപം 15 ലക്ഷം രൂപ ചെലവില്‍ ഒരു ലക്ഷം ലിറ്റര്‍ സംഭരണശേഷിയുള്ള ശുദ്ധജല ടാങ്ക് നിര്‍മിച്ചത്. 2008 ല്‍ നിര്‍മാണം പൂര്‍ത്തിയാക്കിയ ടാങ്കിലേക്കു 13 വര്‍ഷമായിട്ടും പൈപ്പ് കണക്ഷന്‍ നല്‍കി പദ്ധതി പൂര്‍ത്തീകരിക്കാന്‍ അധികൃതര്‍ക്കു കഴിഞ്ഞിട്ടില്ല. പൈപ്പ് ലൈന്‍ സ്ഥാപിക്കുന്നതിനായി 2016 ല്‍ ജില്ലാ പഞ്ചായത്ത് ജല അഥോറിറ്റിക്കു 23 ലക്ഷം രൂപ ഡെപ്പോസിറ്റ് ചെയ്തിരുന്നു. എന്നാല്‍ പദ്ധതിക്കാവശ്യമായ റോഡ് കട്ടിംഗിനു പിഡബ്ല്യുഡി അനുവാദം നല്കാത്തതിനെത്തുടര്‍ന്ന് 2018 ല്‍ ജില്ലാ പഞ്ചായത്ത് തുക തിരിച്ചെടുക്കുകയായിരുന്നു. പ്രളയാനന്തര പ്രവര്‍ത്തനങ്ങള്‍ക്കു മതിയായ ഫണ്ട് തികയാത്ത സാഹചര്യം കണക്കിലെടുത്താണു ജില്ലാ പഞ്ചായത്ത് ഡെപ്പോസിറ്റ് തുക തിരിച്ചെടുത്തത്. ഫണ്ട് ജില്ലാ പഞ്ചായത്ത് തിരിച്ചെടുത്ത വിവരം ഗ്രാമപഞ്ചായത്ത് അറിഞ്ഞില്ലെന്നു ഗ്രാമപഞ്ചായത്ത് പ്രസിഡന്റ് പറഞ്ഞു. പദ്ധതി പൂര്‍ത്തിയാക്കാനാവശ്യമായ എസ്റ്റിമേറ്റ് തയാറാക്കി നല്കാന്‍ ആവശ്യപ്പെട്ടതിന്റെ അടിസ്ഥാനത്തില്‍, ജല അഥോറിറ്റി 37 ലക്ഷം രൂപയുടെ ക്വട്ടേഷന്‍ ഗ്രാമപഞ്ചായത്തിനു നല്കിയിട്ടുണ്ട്. ഇതിന്റെ അടിസ്ഥാനത്തില്‍ 2021 ജൂണില്‍ ജില്ലാ പഞ്ചായത്തിന്റെ 23 ലക്ഷം കഴിച്ചുള്ള ബാക്കി തുകയാണു ഗ്രാമപഞ്ചായത്ത് വാര്‍ഷിക പദ്ധതിയില്‍ നീക്കിവെച്ചിരിക്കുന്നത്. ഇതിനുശേഷമാണു ഫണ്ട് തിരിച്ചെടുത്ത വിവരം അറിയുന്നത്. തുടര്‍ന്ന് 23 ലക്ഷം വീണ്ടും അനുവദിക്കണമെന്നാവശ്യപ്പെട്ടു ജില്ലാ പഞ്ചായത്തിന് അപേക്ഷ നല്കിയിട്ടുണ്ടെന്നും പ്രസിഡന്റ് ലത സഹദേവന്‍ പറഞ്ഞു. ജോലി പൂര്‍ത്തീകരിക്കുന്നതിനാവശ്യമായ ബാക്കി തുക വെള്ളാങ്കല്ലൂര്‍ ബ്ലോക്ക് പഞ്ചായത്തും ഗ്രാമപഞ്ചായത്തും ചേര്‍ന്നു ലഭ്യമാക്കുമെന്നും പ്രസിഡന്റ് കൂട്ടിച്ചേര്‍ത്തു. ജോലികള്‍ പൂര്‍ത്തിയായാല്‍ പടിയൂര്‍ പഞ്ചായത്തിന്റെ തെക്കന്‍ മേഖലകളായ കോങ്ങാടന്‍ തുരുത്ത്, മുഴുവഞ്ചേരി തുരുത്ത്, കെട്ടുചിറ, മതിലകം കടവ്, പണ്ടാരത്തറ എന്നീ പ്രദേശങ്ങളിലെ കുടിവെള്ളക്ഷാമത്തിനു പരിഹാരമുണ്ടാക്കാന്‍ സാധിക്കും. പഞ്ചായത്തില്‍ സമ്പൂര്‍ണ കുടിവെള്ള പദ്ധതി പൂര്‍ത്തീകരിച്ചെങ്കിലും ഈ പ്രദേശങ്ങളിലുള്ളവര്‍ക്ക് ആവശ്യമായ കുടിവെള്ളം ലഭിക്കുന്നില്ലെന്ന പരാതിക്ക് ഈ പദ്ധതി യാഥാര്‍ഥ്യമാകുന്നതോടെ പരിഹാരമാകും. വേനല്‍ കടുത്താല്‍ ഈ പ്രദേശത്ത് കുടിവെള്ളക്ഷാമം രൂക്ഷമാണെന്നു നാട്ടുകാര്‍ പറഞ്ഞു.