ക്രൈസ്റ്റ് കോളജിന് സംസ്ഥാന സര്ക്കാരിന്റെ ജൈവ വൈവിധ്യ പുരസ്കാരം

ക്രൈസ്റ്റ് കോളജ്.
ഇരിങ്ങാലക്കുട: ജൈവവൈവിധ്യങ്ങളുടെ കലവറയായ ഇരിങ്ങാലക്കുട ക്രൈസ്റ്റ് കോളജ് വീണ്ടും സംസ്ഥാന സര്ക്കാര് പുരസ്കാരം. സംസ്ഥാന സര്ക്കാരിന്റെ പരിസ്ഥിതി വകുപ്പിന് കീഴില് പ്രവര്ത്തിക്കുന്ന ജൈവവൈവിധ്യ ബോര്ഡ് ഏര്പ്പെടുത്തിയിരിക്കുന്ന സംസ്ഥാന ജൈവ വൈവിധ്യ പുരസ്കാരത്തിന് കോളജ് വിഭാഗത്തിലാണ് ക്രൈസ്റ്റ് കോളജ് ഒന്നാമത് എത്തിയത്. ജൈവവൈവിധ്യ സംരക്ഷണ രംഗത്ത് നടത്തിവരുന്ന പ്രവര്ത്തനങ്ങളുടെയും വിജയകരമായ പരീക്ഷണങ്ങളുടെയും അടിസ്ഥാനത്തിലാണ് ക്രൈസ്റ്റ് കലാലയം അവാര്ഡിന് അര്ഹമായത്.
പരിസ്ഥിതി ജൈവവൈവിധ്യ സംരക്ഷണ മേഖലയില് സൃഷ്ടിച്ച പുതുമ, ശാസ്ത്രീയ മാര്ഗങ്ങളിലൂന്നിയ പ്രകൃതിസംരക്ഷണം എന്നിവയ്ക്കുള്ള അംഗീകാരമാണ് ക്രൈസ്റ്റ് കോളജിന് ലഭിച്ച അവാര്ഡ്. വൈവിധ്യമാര്ന്ന സസ്യജാലങ്ങള് തണല് വിരിക്കുന്ന ക്യാമ്പസ് പൂര്ണമായും പരിസ്ഥിതി സൗഹാര്ദമാണ്. സീറോ വേസ്റ്റ് ക്യാമ്പസ്, കാര്ബണ് ന്യൂട്രല് ക്യാമ്പസ്, അഗ്രോ ഇന്നവേഷന് പാര്ക്ക് എന്നിവ ക്രൈസ്റ്റിന്റെ വ്യതിരിക്തതകളാണ്.
2023 വര്ഷത്തെ കേരള സംസ്ഥാന ജൈവവൈവിധ്യ ബോര്ഡിന്റെ ജൈവവൈവിധ്യ സംരക്ഷണത്തിനുള്ള അവാര്ഡാണ് ഇപ്പോള് പ്രഖ്യാപിക്കപ്പെട്ടിരിക്കുന്നത്. ക്രൈസ്റ്റ് കോളജില് കുട്ടികളുടെയും അധ്യാപകരുടെയും മേല്നോട്ടത്തില് നടത്തിവരുന്ന ഹരിതാഭമായ അഗ്രോ ഇന്നോവേഷന് പാര്ക്കില് ആധുനികതയും പഴമയും ഇഴചേര്ന്നുള്ള ജൈവവൈവിധ്യ സംരക്ഷണ പ്രവര്ത്തനങ്ങളാണ് നടത്തുന്നത്.