വീടിന് തീയിട്ട കേസിലെ പിടികിട്ടാപ്പുള്ളി അറസ്റ്റില്‍

December 24, 2025

Social media

ആളൂര്‍: വീടിന്റെ പൂട്ട് പൊളിച്ച് അകത്ത് കയറി കട്ടിലും കിടക്കയും തീയിട്ട് നശിപ്പിച്ച കേസിലെ പിടികിട്ടാപ്പുള്ളിയെ പോലീസ് പിടികൂടി. കടുപ്പശ്ശേരി സ്വദേശി പുതുവാട്ടില്‍ വീട്ടില്‍ സുന്ദരന്‍ (54) ആണ് തൃശൂര്‍ റൂറല്‍ പോലീസിന്റെ പിടിയിലായത്. 2019 ജൂലൈ രണ്ടിന് വൈകിട്ട് കടുപ്പശ്ശേരി സ്വദേശി പുതുവാട്ടില്‍ പ്രവീണിന്റെ വീടിന് നേരെയാണ് അക്രമം നടന്നത്. വീടിന്റെ പിന്‍വാതില്‍ പൊളിച്ച് അകത്തു കടന്ന പ്രതി ഹാളിലുണ്ടായിരുന്ന കട്ടിലും കിടക്കയും തീയിട്ട് നശിപ്പിക്കുകയായിരുന്നു.

ഈ കേസില്‍ അറസ്റ്റിലായി ജയിലില്‍ കഴിഞ്ഞിരുന്ന പ്രതി, ജാമ്യത്തിലിറങ്ങിയ ശേഷം കോടതി നടപടികളില്‍ സഹകരിക്കാതെ ഒളിവില്‍ പോവുകയായിരുന്നു. തുടര്‍ന്ന് ഇരിങ്ങാലക്കുട സെഷന്‍സ് കോടതി പ്രതിയെ പിടികിട്ടാപ്പുള്ളിയായി പ്രഖ്യാപിച്ച് വാറണ്ട് പുറപ്പെടുവിച്ചു. ഈ വാറണ്ട് പ്രകാരമാണ് പ്രതിയെ അറസ്റ്റ് ചെയ്തത്. നടപടിക്രമങ്ങള്‍ക്ക് ശേഷം കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു. ആളൂര്‍ പോലീസ് സ്റ്റേഷന്‍ എസ്.ഐ ബെന്നി, സി.പി.ഒമാരായ സിനേഷ്, പി.എ അരുണ്‍, സുജിത്ത്, അരുണ്‍കുമാര്‍, ഹരികൃഷ്ണന്‍ എന്നിവരടങ്ങുന്ന അന്വേഷണ സംഘമാണ് പ്രതിയെ പിടികൂടിയത്.