ഇടിമിന്നലേറ്റ് മാപ്രാണത്ത് വീടിന് വന്‍ നാശനഷ്ടങ്ങള്‍

മാപ്രാണം: ഇടിമിന്നലില്‍ കനത്ത നാശം. ഇന്നലെ ഉച്ചതിരിഞ്ഞ് ഉണ്ടായ ശക്തമായ ഇടിമിന്നലേറ്റ് വീടിനും വീട്ടുപകരണങ്ങള്‍ക്കും കനത്ത നാശം സംഭവിച്ചു. മാപ്രാണം റേഷന്‍ കടയ്ക്ക് സമീപം താമസിക്കുന്ന പാങ്ങാട്ടില്‍ ജയപ്രസാദിന്റെ വീടിനാണ് കനത്ത നാശം സംഭവിച്ചത്. ഇടിവെട്ടും മഴയും തുടങ്ങിയപ്പോള്‍ ജയപ്രസാദ് ഭാര്യ സിന്ധുവും മകനുമൊന്നിച്ച് വീടിനകത്ത് ഇരിക്കുകയായിരുന്നു. പെട്ടെന്ന് കാതടപ്പിക്കുന്ന ശബ്ദവും എന്തൊക്കെയോ തകര്‍ന്ന്് വീഴുന്ന ശബ്ദവും കേട്ട് ഞെട്ടലോടെ അകത്ത് തന്നെയിരുന്നു. വൈദ്യുതിബന്ധവും വിച്ഛേദിക്കപ്പെട്ടു. മഴകുറഞ്ഞപ്പോള്‍ മുറിയില്‍നിന്നും ഇറങ്ങിനോക്കിയപ്പോഴാണ് നാശനഷ്ടങ്ങളുടെ ഭീതിതമായ ദൃശ്യങ്ങള്‍ ജയപ്രസാദ് കാണുന്നത്. കോണ്‍ക്രീറ്റ് മേല്‍ക്കൂരയുള്ള വീടിന്റെ സ്വീകരണമുറിയിലെ ടൈലുകള്‍ ഇളകിത്തെറിച്ചു തറയില്‍ വലിയ ഒരു കുഴി രൂപപ്പെട്ടു. പലയിടത്തും ഭിത്തികളില്‍ വിള്ളല്‍ വീണു. മൂന്ന് ജനല്‍പാളികള്‍ തകര്‍ന്നു. വീട്ടുമുറ്റത്ത് നിന്നിരുന്ന വലിയ ഈട്ടിമരത്തിന്റെ കടയ്ക്കല്‍ വലിയ ഒരു കുഴിയും രൂപപ്പെട്ടിട്ടുണ്ട്. സമീപത്തെ വൃക്ഷങ്ങളുടെ ഇലകളെല്ലാം കത്തിക്കരിഞ്ഞു. പ്രദേശത്തെ പല വീടുകളിലും ടിവി, ഫ്രിഡ്ജ്, ഇന്‍വെര്‍ട്ടര്‍, ഫാന്‍ തുടങ്ങിയ വീട്ടുപകരണങ്ങള്‍ ഇടിമിന്നലില്‍ നശിച്ചതായി അയല്‍വാസികള്‍ പറഞ്ഞു. തലനാരിഴക്കാണ് അപകടത്തിന്റെ ഞെട്ടല്‍ മാറാത്ത ജയപ്രസാദും, കുടുംബവും രക്ഷപ്പെട്ടത്.

About Author

IjkNews Office

See author's posts