വിമതന്മാര്‍ വിജയത്തിന് വിലങ്ങുതടിയാകുമോ, മുന്‍ ചെയര്‍പേഴ്‌സണും വൈസ് ചെയര്‍മാനും സ്വതന്ത്രരായി രംഗത്ത്
അന്ന് കൈപ്പത്തി ചിഹ്നത്തില്‍ ഇന്ന് മെഴുകുതിരിയും വയലിനും
ഇരിങ്ങാലക്കുട: നഗരസഭയില്‍ കോണ്‍ഗ്രസ് സ്ഥാനാര്‍ഥി പട്ടികക്കു പുറത്തു പോയവര്‍ വിമതരായും സ്വന്തന്ത്രരായും മല്‍സര രംഗത്ത് തുടരുന്നതു തലവേദന സൃഷ്ടിച്ചിട്ടുണ്ട്. മുന്‍ നഗരസഭാ ചെയര്‍പേഴ്‌സണ്‍ ബെന്‍സി ഡേവിഡ്, മുന്‍ നഗരസഭാ വൈസ് ചെയര്‍മാന്‍ സതീഷ് പുളിയത്ത്, മുന്‍ കൗണ്‍സിലര്‍ വാഹിദ ഇസ്മയില്‍, കോണ്‍ഗ്രസുമായി പ്രവര്‍ത്തിച്ചിരുന്ന രമേശ് പള്ളിച്ചാടത്ത്, ലിഷോണ്‍ കാട്ടഌ കൊച്ചുത്രേസ്യ ജേക്കബ്, വര്‍ഗീസ് എക്കാടന്‍ എന്നിവരാണു കോണ്‍ഗ്രസിലെ സ്ഥാനാര്‍ഥികള്‍ക്കു വിമതരായി നിന്നു സൗഹൃദ-മല്‍സരം നടത്തുന്നത്. മഹിളാ കോണ്‍ഗ്രസ് നിയോജകമണ്ഡലം പ്രസിഡന്റും നഗരസഭ മുന്‍ ചെയര്‍പേഴ്‌സണുമായ ബെന്‍സി ഡേവിഡ് സ്ഥാനാര്‍ഥി നിര്‍ണയത്തിന്റെ ആദ്യ ഘട്ടത്തില്‍ സിവില്‍ സ്റ്റേഷന്‍ 32-ാം വാര്‍ഡില്‍ സീറ്റ് ഉറപ്പിച്ച നിലയിലായിരുന്നു. ഇതനുസരിച്ച് യുഡിഎഫ് സ്ഥാനാര്‍യെന്ന പേരില്‍ പ്രചരണവും ആരംഭിച്ചിരുന്നു. വഴിയോരങ്ങളില്‍ ഫ്‌ളെക്‌സ് ബോര്‍ഡുകളും വച്ചിരുന്നു. പ്രാദേശിക തര്‍ക്കത്തെ തുടര്‍ന്ന് ഈ വാര്‍ഡിലെ സ്ഥാനാര്‍ഥി നിര്‍ണയം ജില്ലാ കമ്മിറ്റിയുടെ പരിഗണനക്കു വിട്ടിരുന്നു. നോമിനേഷന്‍ സമര്‍പ്പിക്കേണ്ട അവസാന ദിവസമാണു ബെന്‍സി ഡേവിഡിനു യുഡിഎഫില്‍ സീറ്റില്ലെന്നു മനസിലായത്. ഇതേ തുടര്‍ന്നാണു മല്‍സര രംഗത്ത് സ്വതന്ത്രയായി നില്‍ക്കാന്‍ തീരുമാനിച്ചതെന്നു ബെന്‍സി പറയുന്നു. രണ്ടു തവണ കൈപ്പത്തി ചിഹ്നത്തില്‍ മല്‍സരിച്ച തനിക്കു ഇത്തവണ മെഴുകുതിരി ചിഹ്നത്തില്‍ മല്‍സരിക്കേണ്ടിവന്നതു ഗ്രൂപ്പു നേതാക്കളുടെ ധാര്‍ഷ്ട്യമാണന്നും ഇതാണു തന്നെ പോരാട്ട ഭൂമിയിലേക്കു നയിച്ചിരിക്കുന്നതെന്നും ബെന്‍സി പറഞ്ഞു. ഇന്നലെയും ഇന്നും ഇനിയെന്നും കോണ്‍ഗ്രസുക്കാരിയായി പ്രവര്‍ത്തിക്കുമെന്നും ഗ്രൂപ്പിനതീതമായിട്ടാണു താന്‍ പ്രവര്‍ത്തനങ്ങള്‍ കാഴ്ചവെച്ചിട്ടുള്ളതെന്നും ബെന്‍സി വ്യക്തമാക്കി. 2005 ല്‍ ബസ് സ്റ്റാന്‍ഡ് 24-ാം വാര്‍ഡില്‍ നിന്നും യുഡിഎഫ് സ്ഥാനാര്‍ഥിയായി തെരഞ്ഞെടുക്കപ്പെട്ടു വൈസ് ചെയര്‍മാന്‍ സ്ഥാനം വഹിച്ച സതീഷ് പുളിയത്ത് ഇത്തവണ സ്വതന്ത്ര സ്ഥാനാര്‍ഥിയായി രംഗത്തുണ്ട്. കഴിഞ്ഞ രണ്ടു തവണ ഈ വാര്‍ഡ് വനിതാ സംവരണമായിരുന്നു. ഗ്രൂപ്പു തര്‍ക്കമാണു തനിക്ക് സീറ്റ് ലഭിക്കാതിരുന്നതെന്നു വയലിന്‍ ചിഹ്നത്തില്‍ മല്‍സരിക്കുന്ന സതീഷ് പുളിയത്ത് പറഞ്ഞു. ബോയ്‌സ് ഹൈസ്‌കൂള്‍ 22-ാം വാര്‍ഡില്‍ രണ്ടു സ്വതന്ത്ര സ്ഥാനാര്‍ഥികളാണുള്ളത്. രണ്ടു തവണ കൗണ്‍സിലറാവുകയും കോണ്‍ഗ്രസ് ഭരണത്തിലുള്ള ഇരിങ്ങാലക്കുട സഹകരണ ബാങ്കിലെ ഡയറക്ടറുമായ ബേബി ജോസ് കാട്ട്‌ളയുടെ മകന്‍ ലിഷോണ്‍ മെഴുകുതിരി ചിഹ്നത്തില്‍ സ്വതന്ത്ര സ്ഥാനാര്‍ഥിയായി രംഗത്തുണ്ട്. കുട ചിഹ്നത്തില്‍ മല്‍സരിക്കുന്ന യൂത്ത് കോണ്‍ഗ്രസ് വാര്‍ഡ് കമ്മിറ്റി വൈസ് പ്രസിഡന്റ് രമേശ് പള്ളിച്ചാടത്താണു ഈ വാര്‍ഡില്‍ കോണ്‍ഗ്രസിന്റെ മറ്റൊരു വിമതന്‍. മുന്‍ കൗണ്‍സിലറും കോണ്‍ഗ്രസ് മണ്ഡലം സെക്രട്ടറിയുമായ വാഹിദ ഇസ്മയില്‍ ബ്ലോക്ക് ഓഫീസ് 37-ാം വാര്‍ഡില്‍ ബലൂണ്‍ ചിഹ്നത്തില്‍ മല്‍സരിക്കുന്നുണ്ട്. പൂച്ചക്കുളം 28-ാം വാര്‍ഡില്‍ വര്‍ഗീസ് എക്കാടന്‍, മടത്തിക്കര 17-ാം വാര്‍ഡില്‍ കൊച്ചുത്രേസ്യ ജേക്കബ് എന്നിവര്‍ മെഴുകുതിരി ചിഹ്നത്തില്‍ മല്‍സര രംഗത്തുണ്ട്. വിമത സ്ഥാനാര്‍ഥികളുടെ വീടുകള്‍ കയറിയുള്ള സ്‌ക്വാഡ് പ്രവര്‍ത്തനം സജീവമായി നടക്കുന്നുണ്ട്. എന്നാല്‍ കോണ്‍ഗ്രസിന്റെ പരമ്പരാഗത വോട്ടുകള്‍ നഷ്ടപ്പെടാതിരിക്കുവാന്‍ നേതൃത്വം സജീവമായി ഇടപെടലുകള്‍ നടത്തുന്നുണ്ട്.
About Author
മുനമ്പം ജനതയുടെ റവന്യൂ അവകാശങ്ങള്‍ പുന:സ്ഥാപിക്കും വരെ സമരം തുടരും സി.എല്‍.സി. 
മണ്ണിനടിയിലെ മൃതദേഹങ്ങള്‍ മണത്തറിയും; നായപരിശീലകര്‍ക്ക് പരിശീലനവുമായി കെ. നയന്‍ സ്‌ക്വാഡ് 
ഞാറ്ററിവിന്റെ പാഠങ്ങള്‍തേടി ഗവ. ഗേള്‍സ് ഹയര്‍ സെക്കന്‍ഡറി സ്‌ക്കൂളിലെ എന്‍എസ്എസ് വിദ്യാര്‍ഥികള്‍ 
ദേശീയ പല്ലാവൂര്‍ താള വാദ്യോത്സവത്തിന്റെ ഭാഗമായി നല്‍കുന്ന പുരസ്‌കാരങ്ങള്‍ പ്രഖ്യാപിച്ചു 
മുകുന്ദപുരം ചാലക്കുടി താലൂക്ക് തല വാരാഘോഷം ഉദ്ഘാടനം നടന്നു 
ബൈക്കുകള്‍ കൂട്ടിയിടിച്ച് അപകടം; സെക്യൂരിറ്റി ജീവനക്കാരനടക്കം രണ്ടു പേര്‍ മരിച്ചു 
