ഇരിങ്ങാലക്കുട നഗരസഭ, ബജറ്റിന് ഭേദഗതികളോടെ അംഗീകാരം

March 1, 2021

Social media

യാഥാര്‍ഥ്യബോധമില്ലാത്ത ബജറ്റെന്ന് എല്‍ഡിഎഫ്
നടപ്പാക്കാന്‍ കഴിയുന്നതെന്ന് യുഡിഎഫ്
വിയോജിപ്പുമായി ബിജെപി അംഗങ്ങള്‍
ഇരിങ്ങാലക്കുട: നഗരസഭയുടെ 2021-22 വര്‍ഷത്തേക്കുള്ള ബജറ്റ് അംഗീകരിച്ചു. എല്‍ഡിഎഫ് അംഗങ്ങളുടെ ഭേദഗതികള്‍ അംഗീകരിച്ചും ബിജെപി അംഗങ്ങളുടെ വിയോജിപ്പോടെയുമാണ് 1.55 കോടി രൂപ മുന്‍നീക്കിയിരുപ്പും 88.19 കോടി വരവും അടക്കം ആകെ 89.75 കോടി രൂപ വരവും 87.53 കോടി രൂപ ചെലവും 1.21 കോടി നീക്കിയിരിപ്പും പ്രതീക്ഷിക്കുന്ന ബജറ്റ് മുനിസിപ്പല്‍ കൗണ്‍സില്‍ യോഗം പാസാക്കിയത്. 2021-22 വര്‍ഷത്തെ ബജറ്റ്, സ്വപ്‌നബജറ്റല്ലെന്നും നടപ്പാക്കാന്‍ കഴിയുന്ന പദ്ധതികള്‍ ഉള്‍പ്പെടുത്തിയാണു അവതരിപ്പിച്ചിട്ടുള്ളതെന്നും ചര്‍ച്ചയ്ക്ക് ആമുഖമായി ചെയര്‍പേഴ്‌സണ്‍ സോണിയഗിരി പറഞ്ഞു. എന്നാല്‍ യാഥാര്‍ഥ്യബോധത്തോടെയുള്ള ബജറ്റല്ല അവതരിപ്പിച്ചിട്ടുള്ളതെന്നു ചര്‍ച്ചയില്‍ പങ്കെടുത്ത് സംസാരിച്ച എല്‍ഡിഎഫ് പാര്‍ലമെന്ററി പാര്‍ട്ടി ലീഡര്‍ അഡ്വ. കെ.ആര്‍. വിജയ ചൂണ്ടിക്കാട്ടി. ബജറ്റില്‍ അവതരിപ്പിക്കുന്ന പദ്ധതികളുടെ ലക്ഷ്യത്തിലേക്കു പലപ്പോഴും എത്താറില്ലെന്നു കഴിഞ്ഞ 20 വര്‍ഷത്തെ ചരിത്രമെടുത്തു പരിശോധിച്ചാല്‍ മനസിലാക്കാം. ഒമ്പതു വര്‍ഷമായി അടഞ്ഞുകിടക്കുന്ന നഗരസഭാ അറവുശാല ഇതിനുദാഹരണമാണെന്നും കെ.ആര്‍. വിജയ പറഞ്ഞു. ധനകാര്യ സ്റ്റാന്‍ഡിംഗ് കമ്മിറ്റിയംഗങ്ങള്‍ പോലും കാണാത്ത ബജറ്റെന്നായിരുന്നു ബിജെപി പാര്‍ലമെന്ററി പാര്‍ട്ടി ലീഡര്‍ സന്തോഷ് ബോബന്റെ വിമര്‍ശനം. സര്‍ക്കാരിന്റെ ഉടായിപ്പ് പദ്ധതികളുടെ കളക്ഷന്‍ സെന്ററായി നഗരസഭ മാറിയെന്നും സന്തോഷ് ബോബന്‍ കുറ്റപ്പെടുത്തി. ചര്‍ച്ചകള്‍ക്കൊടുവില്‍ അംഗങ്ങള്‍ നിര്‍ദേശിച്ച ഭേദഗതികള്‍ ഉള്‍പ്പെടുത്തുമെന്നു വൈസ് ചെയര്‍മാന്‍ പി.ടി. ജോര്‍ജ് മറുപടി പ്രസംഗത്തില്‍ പറഞ്ഞു. എന്നാല്‍, ബജറ്റ് പാസാക്കുന്നതില്‍ ബിജെപി പാര്‍ലമെന്ററി പാര്‍ട്ടി ലീഡര്‍ സന്തോഷ് ബോബന്‍ വോട്ടെടുപ്പ് ആവശ്യപ്പെട്ടു. അംഗങ്ങളുടെ ഭേദഗതി കൂടി ഉള്‍പ്പെടുത്തി ബജറ്റ് പാസാക്കാമെന്ന നിര്‍ദേശം ചെയര്‍പേഴ്‌സണ്‍ സോണിയഗിരി മുന്നോട്ടുവെച്ചെങ്കിലും സന്തോഷ് ബോബന്‍ വോട്ടെടുപ്പ് എന്ന നിലപാടില്‍ ഉറച്ചുനിന്നു. തുടര്‍ന്നാണു ഭേദഗതികളോടെ ബജറ്റ് അംഗീകരിക്കുന്നതിനെ ബിജെപി എതിര്‍ത്ത് വോട്ട് രേഖപ്പെടുത്തിയത്.