ഫയലുകള്‍ കാണാതാവുന്ന സംഭവത്തില്‍ കൗണ്‍സില്‍ യോഗത്തില്‍ രൂക്ഷവിമര്‍ശനം, ശരിവെച്ച് ചെയര്‍പേഴ്‌സണ്‍
ഇരിങ്ങാലക്കുട: നഗരസഭയില്‍ നിന്നും ഫയലുകള്‍ കാണാതാവുന്ന സംഭവത്തില്‍ രൂക്ഷവിമര്‍ശനവുമായി കൗണ്‍സില്‍ യോഗത്തില്‍ അംഗങ്ങള്‍. വിമര്‍ശനം ശരിവെച്ച് ചെയര്‍പേഴ്‌സണ്‍ സോണിയ ഗിരി. 2016-2017 കാലഘട്ടത്തില്‍ ഹരിത കേരളം പദ്ധതിയുമായി ബന്ധപ്പെട്ട് നടത്തിയ പ്രവൃത്തിക്ക് മുന്‍കൂര്‍ നല്‍കി പണം ക്രമവല്‍ക്കരിക്കുന്നതു സംബന്ധിച്ച അജണ്ടയാണ് അംഗങ്ങളുടെ രൂക്ഷവിമര്‍ശനത്തിനിടയാക്കിയത്. പദ്ധതിയുമായി ബന്ധപ്പെട്ട ബില്ലുകളും, വൗച്ചറുകളും അക്കൗണ്ട് സെക്ഷനില്‍ കണ്ടെത്താന്‍ കഴിഞ്ഞിട്ടില്ലെന്ന് അജണ്ടയില്‍ സൂചിപ്പിച്ചിരുന്നു. തുടര്‍ന്നാണ് നഗരസഭയുടെ മാത്രമല്ല സ്വകാര്യ വ്യക്തികള്‍ നഗരസഭയില്‍ സമര്‍പ്പിക്കുന്ന ഫയലുകള്‍ പലതും നഷ്ടപ്പെടുന്നതായി അംഗങ്ങള്‍ ചൂണ്ടിക്കാട്ടിയത്. അംഗങ്ങളുടെ വിമര്‍ശനം ഉള്‍കൊണ്ട ചെയര്‍പേഴ്‌സണ്‍ സോണിയ ഗിരി ഫയലുകള്‍ നഷ്ടപ്പെടുന്ന സംഭവം ആവര്‍ത്തിക്കരുതെന്നും, പൊതുജനങ്ങളുടെ കയ്യില്‍ രശീതിയുള്ള ഫയലുകള്‍ നഷ്ടപ്പെട്ടാല്‍ ബന്ധപ്പെട്ട ഉദ്യോഗസ്ഥര്‍ക്കെതിരെ നടപടി സ്വീകരിക്കണമെന്നും സെക്രട്ടറിക്ക് നിര്‍ദേശം നല്‍കി. മഴക്കാല പൂര്‍വശൂചീകരണത്തിന്റെ ഭാഗമായി നഗരസഭ പ്രദേശത്തെ പരമ്പരാഗത ജലസ്രോതസുകളും, തോടുകളും, ശൂചീകരിക്കാന്‍ നേതൃത്വം നല്‍കണമെന്ന് ചെയര്‍പേഴ്‌സണ്‍ സോണിയ ഗിരി കൗണ്‍സില്‍ യോഗത്തില്‍ ചൂണ്ടിക്കാട്ടി. നഗരസഭ പ്രദേശത്തെ പല പരമ്പരാഗത തോടുകളും ഇപ്പോള്‍ കാണാനില്ലാത്ത അവസ്ഥയിലാണ്. ഇത്തരം തോടുകള്‍ കണ്ടെത്തി നഗരസഭ ഉദ്യോഗസ്ഥരെ അറിയിച്ചാല്‍ തോടുകള്‍ പുനസ്ഥാപിക്കുന്നതിനുള്ള നടപടികള്‍ സ്വീകരിക്കുമെന്നും ചെയര്‍പേഴ്‌സണ്‍ സോണിയ ഗിരി പറഞ്ഞു. കൂടല്‍മാണിക്യം ക്ഷേത്രം കൊട്ടിലാക്കല്‍ പറമ്പിലുണ്ടായിരുന്ന കുളങ്ങള്‍ പുനസ്ഥാപിക്കാനുള്ള നടപടി സ്വീകരിക്കണമെന്നും ബിജെപി പാര്‍ലമെന്ററി പാര്‍ട്ടി ലീഡര്‍ സന്തോഷ് ബോബന്‍ ആവശ്യപ്പെട്ടു. കൂടല്‍മാണിക്യം ക്ഷേത്രോത്സവവുമായി ബന്ധപ്പെട്ട് കൊട്ടിലാക്കല്‍ പറമ്പിലുണ്ടാകുന്ന മാലിന്യങ്ങള്‍ നീക്കം ചെയ്യാന്‍ നഗരസഭ ദേവസ്വത്തിന് നിര്‍ദേശം നല്‍കണമെന്നും സന്തോഷ് ബോബന്‍ ആവശ്യപ്പെട്ടു. ഇരിങ്ങാലക്കുട ഗവ മോഡല്‍ ബോയ്‌സ് ഹയര്‍ സെക്കന്‍ഡറി സ്‌കൂളില്‍ കിഫ്ബി ബണ്ട് ഉപയോഗിച്ച് നിര്‍മിക്കുന്ന കെട്ടിടത്തിന്റെ നിര്‍മാണം മണ്ണ് ലഭ്യമാവാത്തതിനെ തുടര്‍ന്ന് സ്തംഭനാവസ്ഥയിലാണന്ന് എല്‍ഡിഎഫ് അംഗവും വിദ്യാഭ്യാസ സ്റ്റാന്‍ഡിംഗ് കമ്മറ്റി ചെയര്‍പേഴ്‌സണുമായ അഡ്വ. ജിഷ ജോബി കൗണ്‍സില്‍ യോഗത്തില്‍ പറഞ്ഞു. ഇക്കാര്യത്തില്‍ നഗരസഭ പ്രദേശത്തു നിന്നും മണ്ണ് ലഭ്യമാക്കുന്നതിന് അടിയന്തിര നടപടി സ്വീകരിക്കാന്‍ ചെയര്‍പേഴ്‌സണ്‍ മുനിസിപ്പല്‍ എന്‍ജിനീയര്‍ക്ക് നിര്‍ദേശം നല്‍കി. വയോമിത്രം പദ്ധതി നടപ്പാക്കുന്നതുമായി ബന്ധപ്പെട്ട് കഴിഞ്ഞ കൗണ്‍സില്‍ യോഗത്തിന്റെ മിനിറ്റ്‌സ് മുനിസിപ്പല്‍ കൗണ്‍സിലിനെ അപമാനിക്കുന്ന തരത്തിലുള്ളതാണന്ന് ബിജെപി പാര്‍ലമെന്ററി പാര്‍ട്ടി ലീഡര്‍ സന്തോഷ് ബോബന്‍ കുറ്റപ്പെടുത്തി. വയോമിത്രം പദ്ധതി പൊതുസ്ഥലങ്ങളില്‍ നടത്തണമെന്ന് കൗണ്‍സിലിലെ ഭൂരിപക്ഷം അംഗങ്ങളും ആവശ്യപ്പെട്ടിട്ടും, മിനിറ്റ്‌സില്‍ മറിച്ചാണ് രേഖപ്പെടുത്തിയിരിക്കുന്നതെന്ന് സന്തോഷ് ബോബന്‍ ചൂണ്ടിക്കാട്ടി. മിനിറ്റ്‌സില്‍ ചര്‍ച്ചകള്‍ ഉള്‍കൊള്ളിച്ചിട്ടുണ്ടെന്നും ചെയര്‍പേഴ്‌സന്റെ ഭാഗത്തു നിന്നും വന്ന തീരുമാനമാണ് രേഖപ്പെടുത്തിയിട്ടുളളതെന്നും സെക്രട്ടറി വിശദീകരിച്ചു. മുനിസിപ്പല്‍ ചെയര്‍പേഴ്‌സണ്‍ സോണിയ ഗിരി അധ്യക്ഷത വഹിച്ചു.
About Author
കരൂപ്പടന്ന എന്‍എസ്എസ് വളണ്ടിയര്‍മാര്‍ പല്ലൊട്ടി സിനിമയുടെ അണിയറ പ്രവര്‍ത്തകരുമായി സംവദിച്ചു 
വാര്‍ഡ് വിഭജനം; കരട് വിജ്ഞാപനമായി; ഇരിങ്ങാലക്കുട നഗരസഭയില്‍ ഇനി 43 വാര്‍ഡുകള്‍ 
കരുതിയിരിക്കുക, ഓണ്‍ലൈന്‍ തട്ടിപ്പുകളില്‍ വീഴരുതേ……ആദ്യം ഫോണ്‍ വിളി, താങ്ങളുടെ പേരില്‍ ക്രൈം കേസുകളുണ്ടെന്നു മുന്നറിയിപ്പ് 
ടൗണ്‍ അമ്പ് ഫെസ്റ്റ് 2025 സ്വാഗത സംഘം ഓഫീസ് ഉദ്ഘാടനം ചെയ്തു 
നഗരസഭയുടെ ഭരണപരാജയം; ആം ആദ്മി പാര്‍ട്ടി പന്തംകൊളുത്തി പ്രകടനം നടത്തി 
പിടികിട്ടാപ്പുള്ളി 26 വര്‍ഷത്തിന് ശേഷം അറസ്റ്റില്‍ 
