കൂടല്‍മാണിക്യം ക്ഷേത്രത്തിലെ ഉത്സവത്തിനു കൊടിയേറി
ഇരിങ്ങാലക്കുട: വൈഷ്ണവ മന്ത്രത്താല്‍ ശബ്ദമുഖരിതമായ അന്തരീക്ഷത്തില്‍ കൂടല്‍മാണിക്യം ക്ഷേത്രത്തിലെ ഉത്സവത്തിനു കൊടിയേറി. ഇതോടെ ഇനി പത്തുനാള്‍ നഗരം ഉത്സവലഹരിയില്‍. ഇന്നലെ രാത്രി പാണിയും തിമിലയും ചേങ്ങിലയും ചേര്‍ന്നു സൃഷ്ടിച്ച നാദലയത്തില്‍ മന്ത്രങ്ങള്‍ ആവാഹിച്ചു ക്ഷേത്രം തന്ത്രി നകരമണ്ണ് ത്രിവിക്രമന്‍ നമ്പൂതിരിയാണു കൊടിയേറ്റം നിര്‍വഹിച്ചത്. ആചാര്യവരണം എന്ന ചടങ്ങോടെയാണു കൊടിയേറ്റ കര്‍മങ്ങള്‍ക്കു തുടക്കം കുറിച്ചത്. പാണി കൊട്ടിക്കഴിഞ്ഞ് തന്ത്രിയും പരിവാരങ്ങളും പുറത്തു വന്ന് കൊടിമരം പ്രദക്ഷിണം ചെയ്ത് പുണ്യാഹം തളിച്ച് കൊടിമരപൂജ നടത്തിയതിനുശേഷമാണു കൊടിയേറ്റിയത്. ഈ സമയം കൂത്തമ്പലത്തില്‍ കൂത്തിനായി മിഴാവ് കൊട്ടി. തുടര്‍ന്ന് അത്താഴപൂജ നടന്നു. തുടര്‍ന്ന് സൂത്രധാ കൂത്തും വില്ല്യവട്ടത്ത് നങ്ങാര്‍മഠം അവതരിപ്പിച്ച നങ്ങ്യാര്‍ക്കൂത്തും അരങ്ങേറി. കൊരമ്പ് മൃദംഗ കളരിയിലെ കുട്ടികള്‍ അവതരിപ്പിച്ച മൃദംഗമേളവും നടന്നു. ഇന്ന് കൊടിപ്പുറത്ത് വിളക്കാഘോഷം നടക്കും.
കൂടല്‍മാണിക്യത്തില്‍ ഇന്ന്- കൊടിപ്പുറത്ത് വിളക്ക്
രാവിലെ ആറിന് എതൃത്ത പൂജ, രാവിലെ 8.30 മുതല്‍ കലശാഭിഷേകം, ഉച്ചപൂജ, രാവിലെ എട്ടുമണി മുതല്‍ കിഴക്കേ നടപ്പുരയില്‍ സദ്ഗുരു ത്യാഗരാജ പഞ്ചരത്‌ന കീര്‍ത്തനാലാപനം അന്നമനട ബാബുരാജ്, ലത ശ്രീറാം, ശ്രുതി ശ്രീറാം, രാജീവ് സപര്യ എന്നിവരുടെ നേതൃത്വത്തില്‍ 50 ഓളം കലാകാരന്‍മാര്‍ പങ്കെടുക്കുന്നു. രാവിലെ ഒമ്പതു മുതല്‍ ഉച്ചയ്ക്കു 1.30 വരെ ബ്രഹ്മശ്രീ ഈറോഡ് രാജാമണി ഭാഗവതരുടെ നേതൃത്വത്തില്‍ കിഴക്കേ നടപ്പുരയില്‍ സമ്പ്രദായ ഭജന നടക്കും. വൈകീട്ട് 5.30 നു കുലീപിനി തീര്‍ഥമണ്ഡപത്തില്‍ നാരായണന്‍ നമ്പ്യാരുടെ നേതൃത്വത്തില്‍ പാഠകം ഉണ്ടാകും. 6.30 നു രാജീവ് വെങ്കിടങ്ങ് അവതരിപ്പിക്കുന്ന കുറത്തിയാട്ടം, 7.45 നു മാതൃക്കല്‍ ബലി ദര്‍ശനം, രാത്രി എട്ടിനു സാംസ്‌കാരിക സമ്മേളനം, രാത്രി 9.30 മുതല്‍ കേളത്ത് അരവിന്ദാക്ഷന്‍ മാരാര്‍ അവതരിപ്പിക്കുന്ന പഞ്ചാരി മേളം, രാത്രി 10 മുതല്‍ 11 വരെ തൊക്‌ചോം ഇബിമുബി ദേവി അവതരിപ്പിക്കുന്ന മണിപ്പൂരി നൃത്തം, രാത്രി 12 മുതല്‍ യക്ഷഗാനം വാലിമോക്ഷം.
സ്‌പെഷല്‍ പന്തലില്‍ കലാപരിപാടികളുടെ ഉദ്ഘാടനം ഇന്ന് നടക്കും
ക്ഷേത്രോല്‍സവത്തോടനുബന്ധിച്ച് സ്‌പെഷല്‍ പന്തലില്‍ ഇന്നു രാത്രി എട്ടിനു കലാപരിപാടികളുടെ ഉദ്ഘാടനം ദേവസ്വം മന്ത്രി കെ. രാധാകൃഷ്ണന്‍ നിര്‍വഹിക്കും. ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു അധ്യക്ഷത വഹിക്കും. നഗരസഭ ചെയര്‍പേഴ്‌സണ്‍ സോണിയഗിരി മുഖ്യാതിഥിയായിരിക്കും. രാജീവ് വാര്യര്‍, ദേവസ്വം ചെയര്‍മാന്‍ യു. പ്രദീപ് മേനോന്‍, ഗുരുവായൂര്‍ ദേവസ്വം ബോര്‍ഡ് ചെയര്‍മാന്‍ ഡോ. വി.കെ. നന്ദകുമാര്‍, കൊച്ചിന്‍ ദേവസ്വം ബോര്‍ഡ് പ്രസിഡന്റ് വി. നന്ദകുമാര്‍, നഗരസഭ പ്രതിപക്ഷ നേതാവ് അഡ്വ. കെ.ആര്‍. വിജയ, കൗണ്‍സിലര്‍മാരായ സന്തോഷ് ബോബന്‍, സ്മിത കൃഷ്ണകുമാര്‍, കമ്മിറ്റിയംഗങ്ങളായ ഭരതന്‍ കണ്ടേങ്കാട്ടില്‍, ബ്രഹ്മശ്രീ എന്‍.പി. പരമേശ്വരന്‍ നമ്പൂതിരിപ്പാട്, അഡ്വ. കെ.ജി. അജയ്കുമാര്‍, എ.വി. ഷൈന്‍, കെ.എ. പ്രേമരാജന്‍, കെ.ജി. സുരേഷ്, കൂടല്‍മാണിക്യം ദേവസ്വം അഡ്മിനിസ്‌ട്രേറ്റര്‍ എം. സുഗീത എന്നിവര്‍ പ്രസംഗിക്കും.
About Author
മൂന്നാമത് വിമല ഇന്റര്‍ സ്‌കൂള്‍ സ്‌കേറ്റിംഗ് ചാമ്പ്യന്‍ഷിപ്പ് ഫെബ്രുവരി ഒന്നിന് 
ഇരിങ്ങാലക്കുട ക്രൈസ്റ്റ് കോളജില്‍ ഇംഗ്ലീഷ് അന്തര്‍ദേശീയ സെമിനാര്‍ 
പടിയൂര്‍ മേഖലയില്‍ കാട്ടുപന്നിശല്യം രൂക്ഷം; നാട്ടുകാര്‍ ആശങ്കയില്‍ 
മലയാളികളുടെ സാംസ്‌കാരിക ജീവിതത്തില്‍ വിലയേറിയ സംഭാവനകള്‍ നല്‍കാന്‍ ഗ്രന്ഥശാല പ്രവര്‍ത്തനത്തിന് സാധിച്ചിട്ടുണ്ട്-മന്ത്രി ഡോ. ആര്‍. ബിന്ദു 
അരിപ്പാലം സേക്രട്ട് ഹാര്‍ട്ട് കോണ്‍വെന്റിന്റെയും വിദ്യാജ്യോതി ഇംഗ്ലീഷ് മീഡിയം സ്‌കൂളിന്റെയും സുവര്‍ണ്ണ ജൂബിലി ആഘോഷം 
മുകുന്ദപുരം പബ്ലിക് സ്‌കൂളില്‍ റോഡ് സുരക്ഷ ബോധവല്‍ക്കരണം 
