കൂടല്‍മാണിക്യം ക്ഷേത്രത്തില്‍ ഭഗവാന്റെ തിരുമുന്നില്‍ കുത്തുവിളക്കുപിടിയുടെ പാരമ്പര്യവുമായി 12 കുടുംബങ്ങള്‍

May 5, 2026

Social media

ഇരിങ്ങാലക്കുട: ഇരിങ്ങാലക്കുടയിലെ കൂടല്‍മാണിക്യം ക്ഷേത്രവുമായി ബന്ധപ്പെട്ടു നൂറ്റാണ്ടുകളായി തുടരുന്ന അപൂര്‍വ്വമായ ഒരു ആചാരമാണ് തിരുമുന്നില്‍ കുത്തുവിളക്കുപിടി. സംഗമേശ്വരന്റെ എഴുന്നള്ളിപ്പുകളില്‍ ദേവന്റെ മുന്നില്‍ പന്ത്രണ്ട് വിളക്കുകളുമായി അകമ്പടി നില്‍ക്കുന്ന ഈ അനുഷ്ഠാനം, ഭക്തിയുടെയും സമര്‍പ്പണത്തിന്റെയും അതുല്യ പ്രതീകമാണ്. ഈ വിശിഷ്ട സേവനം നിര്‍വ്വഹിക്കുന്നത് പന്ത്രണ്ട് ഭവനക്കാര്‍ എന്നറിയപ്പെടുന്ന അമ്പലവാസി കുടുംബങ്ങളാണ്.

വാരിയര്‍, പിഷാരടി, നമ്പീശന്‍ എന്നീ വിഭാഗങ്ങളില്‍പ്പെട്ട പന്ത്രണ്ട് കുടുംബങ്ങള്‍ തലമുറകളായി ഈ പൈതൃകം കൈമാറി വരുന്നു. വാരിയര്‍ കുടുംബങ്ങളില്‍ തെക്കേ വാരിയം, വടക്കേ വാരിയം, തൃപ്പയ്യ വാരിയം എന്നിവ ഉള്‍പ്പെടുന്നു. പിഷാരടി കുടുംബങ്ങളില്‍ അറക്കല്‍ പിഷാരം, കൃഷ്ണ പിഷാരം, കല്ലെങ്കര പിഷാരം, പുത്തന്‍ പിഷാരം, കിഴക്കേ പിഷാരം, വടക്കേ പിഷാരം എന്നിവയും, നമ്പീശന്‍ കുടുംബങ്ങളില്‍ തെക്കേ പട്ടം, വടക്കേ പട്ടം, വേളൂക്കര പട്ടം എന്നിവയും ചേര്‍ന്ന് ഈ പാരമ്പര്യത്തിന്റെ അടിത്തറ രൂപീകരിക്കുന്നു. ഓരോ കുടുംബവും ഓരോ വിളക്കിന്റെ ചുമതല ഏറ്റെടുത്ത് എഴുന്നള്ളിപ്പില്‍ ദേവന്റെ മുമ്പില്‍ അകമ്പടി സേവനം നിര്‍വ്വഹിക്കുന്നു.

ഈ വിളക്കുകള്‍ വെറും പ്രകാശമല്ല; ഓരോ കുടുംബത്തിന്റെ സമര്‍പ്പണവും ഉത്തരവാദിത്തവും പ്രതിനിധീകരിക്കുന്ന പൈതൃകചിഹ്നങ്ങളാണ്. ഈ ആചാരത്തിന്റെ പ്രധാന സവിശേഷത, അത് നിഷ്‌കാമ സേവനമാണെന്നതാണ്. യാതൊരു പ്രതിഫലവും പ്രതീക്ഷിക്കാതെ, ഭഗവാനോടുള്ള സമര്‍പ്പണമായി ഈ അനുഷ്ഠാനം ഇന്നും തുടരുന്നു. കാലക്രമേണ ചില കുടുംബങ്ങള്‍ക്ക് ഇത് തുടര്‍ന്നുകൊണ്ടുപോകാന്‍ സാധിക്കാതെ വന്നപ്പോഴും, മറ്റ് കുടുംബങ്ങള്‍ അതിന്റെ ചുമതല ഏറ്റെടുത്ത് പന്ത്രണ്ട് വിളക്കുകളുടെ പാരമ്പര്യം അക്ഷീണം നിലനിര്‍ത്തിയിരിക്കുന്നു.