ബെംഗളൂരുവിലെ നിറഞ്ഞ സദസില്‍ മൃച്ഛകടികം കൂടിയാട്ടം

January 24, 2026

Social media

ഇരിങ്ങാലക്കുട: ബെംഗളൂരുവിലെ വിഖ്യാത കലോത്സവമായ ബെംഗളൂരു ഹബ്ബയില്‍ നിറഞ്ഞ സദസില്‍ ഇരിങ്ങാലക്കുട നടനകൈര ളിയുടെ മൃച്ഛകടികം കൂടിയാട്ടം അരങ്ങേറി. നോബല്‍ സമ്മാന ജേതാവായ സി.വി. രാമന്റെ ജന്മഗൃഹം കേന്ദ്രമാക്കി സംഘടിപ്പിക്കുന്ന കലോത്സവമാണിത്. ശൂദ്രകന്‍ എന്ന നാടകകൃത്ത് 1500 വര്‍ഷങ്ങള്‍ക്കു മുന്‍പ് ആത്മ കഥാരൂപത്തില്‍ രചിക്കപ്പെട്ട അത്യപൂര്‍വമായ പ്രകരണം എന്ന വിഭാഗത്തില്‍പ്പെടുന്ന അപൂര്‍വ സാമൂഹിക നാടകമാണിത്.

ചൂതുകളിക്കാര്‍, തസ്‌കരന്‍, ആനക്കാരന്‍ തുടങ്ങി സമൂഹത്തിലെ സാധാരണക്കാരുടെ കഥയാണ് ഇതിവൃത്തം. കൂടിയാട്ടത്തില്‍ ഈ കൃതി ചിട്ടപ്പെടുത്തിയത് കൂടിയാട്ടം ആചാര്യനായ വേണുജിയാണ്. ബെംഗളൂരുവില്‍ ഭൂമിജ ട്രസ്റ്റ് സംഘടിപ്പിക്കുന്ന മൂന്നാമത്തെ അരങ്ങാണിത്. കപില വേണു, സൂരജ് നമ്പ്യാര്‍, കലാമണ്ഡലം ജിഷ്ണു പ്രതാപ്, മാര്‍ഗി സജീവ് നാരായണ ചാക്യാര്‍, ശങ്കര്‍ വെങ്കടേശ്വരന്‍, പൊതിയില്‍ രഞ്ജിത്ത് ചാക്യാര്‍, നേപഥ്യ ശ്രീഹരി ചാക്യാര്‍, സരിതാ കൃഷ്ണകുമാര്‍, മാര്‍ഗി അഞ്ജന എസ്. ചാക്യാര്‍, അരന്‍ കപില എന്നിവര്‍ പ്രധാന കഥാപാത്രങ്ങളെ അവതരിപ്പിച്ചു. കലാമണ്ഡലം രാജീവ്, കലാമണ്ഡലം ഹരിഹരന്‍, രാഹുല്‍ എന്നിവര്‍ മിഴാവിലും കലാനിലയം ഉണ്ണികൃഷ്ണന്‍ ഇടയ്ക്കയിലും പശ്ചാത്തലമേളം ഒരുക്കി.