ഇരിങ്ങാലക്കുട കോര്‍ട്ട് കോംപ്ലക്‌സ്; നിര്‍മാണം പൂര്‍ത്തിയായാല്‍ ഉടന്‍ ഉദ്ഘാടനം – കേന്ദ്രമന്ത്രി സുരേഷ് ഗോപി

January 23, 2026

Social media

ഉദ്ഘാടനത്തിന് പ്രധാനമന്ത്രി നരേന്ദ്രമോദിയോ, കേന്ദ്ര നിയമ മന്ത്രിയോ വരുമെന്നു സുരേഷ് ഗോപി

ഇരിങ്ങാലക്കുട: നിര്‍മാണം പൂര്‍ത്തിയായാല്‍ വരുന്ന നിയമസഭ തെരഞ്ഞെടുപ്പിന് മുന്‍പായി കോര്‍ട്ട് കോംപ്ലക്‌സ് ഉദ്ഘാടനം ചെയ്യുമെന്ന് സ്ഥലം സന്ദര്‍ശിച്ചശേഷം കേന്ദ്രമന്ത്രി സുരേഷ് ഗോപി. അടുത്ത മാസം പ്രധാനമന്ത്രി നരേന്ദ്ര മോദി തൃശൂരില്‍ വരുന്നുണ്ട്.എന്നുവരണമെന്നുള്ളത് ഇതിന്റെ പൂര്‍ത്തീകരണം കൂടി അറിഞ്ഞിട്ട് തീരുമാനിക്കും. അതല്ലെങ്കില്‍ എപ്പോഴാണെന്നറിയിച്ചാല്‍ കേന്ദ്ര നിയമ മന്ത്രി വരുമെന്നും സുരേഷ് ഗോപി പറഞ്ഞു.

മിനി സിവില്‍ സ്റ്റേഷന്‍ കോമ്പൗണ്ടില്‍ 60 ശതമാനം കേന്ദ്രവിഹിതവും 40 ശതമാനം സംസ്ഥാനവിഹിതവുമായി 93.25 കോടി ചെലവഴിച്ച് 80 മീറ്റര്‍ നീളത്തിലും 45 മീറ്റര്‍ വീതിയിലുമായി 1.68 ലക്ഷം ചതുരശ്ര അടിയില്‍ ഏഴുനിലകളിലായിട്ടാണ് കോര്‍ട്ട് കോംപ്ലക്‌സ് നിര്‍മിക്കുന്നത്. ഇതിലും വലിയ കോടതി സമുച്ഛയമാണ് തിരുവനന്തപുരത്ത് വരുന്നത്. ഇതിന്റെ നടപടിക്രമങ്ങള്‍ ആരംഭിച്ചു കഴിഞ്ഞതായും സുരേഷ് ഗോപി കൂട്ടിച്ചേര്‍ത്തു.

ഇരിങ്ങാലക്കുട ബാര്‍ അസോസിയേഷന്‍ പ്രസിഡന്റ് അഡ്വ. വി.എസ്. ലിയോ, സെക്രട്ടറി അഡ്വ. കെ.ജെ. ജോണ്‍സണ്‍ എന്നിവരുടെ നേതൃത്വത്തില്‍ കേന്ദ്ര മന്ത്രിയെ സ്വീകരിച്ചു. ഇരിങ്ങാലക്കുട സിവില്‍ സ്റ്റേഷനില്‍ ഒരു പോസ്റ്റ് ഓഫീസ് തുടങ്ങണമെന്നാവശ്യപ്പെട്ട് കേരള ലോയേഴ്സ് ക്ലാര്‍ക്ക് അസോസിയേഷന്‍ സുരേഷ് ഗോപിക്ക് നിവേദനം നല്‍കി. നിവേദനം സ്വീകരിച്ച കേന്ദ്രമന്ത്രി പോസ്റ്റ് ഓഫീസിനാവശ്യമായ സ്ഥലവും സൗകര്യങ്ങളുമെല്ലാം നിവേദനത്തില്‍ ഉള്‍പ്പെടുത്തി നല്‍കാന്‍ നിര്‍ദേശം നല്‍കി. ബാര്‍ അസോസിയേഷന്‍ ഓഫീസും കേന്ദ്രമന്ത്രി സന്ദര്‍ശിച്ചു.