കുച്ചിപ്പുടിയില്‍ വീണ്ടും കാറ്റ്‌ലിന്റെ വിജയത്തിളക്കം; സഹോദയ കലോത്സവത്തില്‍ ഒന്നാം സ്ഥാനം

ഇരിങ്ങാലക്കുട: തൃശൂര്‍ സെന്‍ട്രല്‍ സിബിഎസ്ഇ സഹോദയ കലോത്സവത്തില്‍ കാറ്റഗറി മൂന്നിലെ കുച്ചിപ്പുടിയില്‍ ഒന്നാം സ്ഥാനം നേടി കാറ്റ്‌ലിന്‍ ബിന്‍സ്റ്റോം. മാളയിലെ ഡോ. രാജു ഡേവീസ് ഇന്റര്‍നാഷണല്‍ സ്‌കൂളിലെ പത്താം ക്ലാസ് വിദ്യാര്‍ഥിനിയായ കാറ്റ്‌ലിന്‍ തുടര്‍ച്ചയായ വിജയങ്ങളിലൂടെ കലാരംഗത്ത് ശ്രദ്ധേയയാവുകയാണ്. കഴിഞ്ഞ വര്‍ഷം കുച്ചിപ്പുടി, ഭരതനാട്യം എന്നീ ഇനങ്ങളില്‍ സംസ്ഥാനതലത്തില്‍ ഒന്നാം സ്ഥാനം നേടിയ കാറ്റ്‌ലിന്‍ ഇത്തവണയും മികച്ച പ്രകടനമാണ് കാഴ്ചവച്ചത്.

ഈ കലോത്സവത്തില്‍ തന്നെ ഭരതനാട്യത്തില്‍ ഒന്നാം സ്ഥാനം നേടുകയും നാടോടിനൃത്തത്തില്‍ മത്സരിക്കുകയും ചെയ്തിരുന്നു. എട്ടാം ക്ലാസ് മുതലാണ് കാറ്റ്‌ലിന്‍ കുച്ചിപ്പുടി അഭ്യസിച്ചുതുടങ്ങിയത്. എടപ്പിള്ളി നാട്യശാലയില്‍ സൂരജ് നായരുടെ കീഴിലാണ് പരിശീലനം. സഹപാഠിയായ മീനാക്ഷി എസ്. വര്‍മ ആലപിച്ച ഗാനത്തിനൊപ്പമാണ് കാറ്റ്‌ലിന്‍ കുച്ചിപ്പുടി അവതരിപ്പിച്ചത്. കുട്ടികൃഷ്ണന്റെ ലീലാവിലാസങ്ങളാണ് നൃത്താവിഷ്‌കാരത്തിലൂടെ അരങ്ങിലെത്തിച്ചത്.