കര്‍ഷക സമരത്തിന് ഐക്യദാര്‍ഢ്യം: ഇരിങ്ങാലക്കുട രൂപത പാസ്റ്ററല്‍ കൗണ്‍സില്‍
ഇരിങ്ങാലക്കുട: കഴിഞ്ഞ 52 ദിവസമായിട്ട് രാജ്യ തലസ്ഥാന നഗരിയില്‍ കര്‍ഷകര്‍ നടത്തിക്കൊണ്ടിരിക്കുന്ന കര്‍ഷക സമരത്തിന് ഇരിങ്ങാലക്കുട രൂപത പാസ്റ്ററല്‍ കൗണ്‍സില്‍ ഐക്യദാര്‍ഢ്യം പ്രഖ്യാപിച്ചു. കാര്‍ഷിക ഉത്പന്നങ്ങളുടെ, പ്രത്യേകിച്ച് അരിയുടേയും ഗോതമ്പിന്റേയും ഉത്പാദനത്തേയും വിപണനത്തേയും പൊതുസംഭരണത്തേയും ബാധിക്കുന്ന തരത്തിലാണു മൂന്നു കാര്‍ഷിക ബില്ലുകള്‍ പാസാക്കിയിരിക്കുന്നത്. കാര്യമായ ചര്‍ച്ചകള്‍ നടത്താതെ ബില്ലുകള്‍ സംബന്ധിച്ച കര്‍ഷകരുടെ ആശങ്കകള്‍ പരിഹരിക്കാതെ ബില്ലുകള്‍ പാര്‍ലമെന്റിന്റെ സെലക്ട് കമ്മിറ്റിക്ക് വിടണമെന്ന പ്രതിപക്ഷത്തിന്റെ നിര്‍ദേശങ്ങള്‍ ചെവികൊള്ളാതെ പാസാക്കിയ ഈ ബില്ലുകള്‍ പിന്‍വലിക്കണമെന്ന കര്‍ഷകരുടെ ന്യായമായ ആവശ്യത്തോടു ഇരിങ്ങാലക്കുട രൂപത പാസ്റ്ററല്‍ കൗണ്‍സില്‍ ഐക്യദാര്‍ഢ്യം പ്രഖ്യാപിച്ചു. വിപണികള്‍ തുറന്നുകൊടുക്കുന്നതു വഴി കോര്‍പറേറ്റുകള്‍ക്കാണു അത്യന്തികമായി നേട്ടമുണ്ടാകുക. അന്നദാതാവായ കര്‍ഷകനെ നമിച്ചിരുന്ന ഒരു കാര്‍ഷിക സംസ്‌കൃതിയുടെ പിന്‍തലമുറക്കാരാണു നമ്മള്‍. രാജ്യ തലസ്ഥാന മൈതാനത്ത് പിടഞ്ഞു പൊലിയുന്ന ഓരോ മനുഷ്യ ജീവനും പകലന്തിയോളം പൊരിവെയിലത്ത് പണിയെടുത്തു സ്വന്തം കുടുംബത്തെ മാത്രമല്ല രാജ്യത്തെയൊന്നാകെ തീറ്റിപ്പോറ്റുന്ന കര്‍ഷകരുടെ ത്യാഗത്തിനു പകരം വെക്കാന്‍ മറ്റൊന്നുമില്ലെന്നും യോഗം വിലയിരുത്തി. കര്‍ഷകരുടെ ജീവനെ കൂടുതല്‍ ആശങ്കകളിലേക്കും ദുരിതങ്ങളിലേക്കും ആത്മഹത്യയിലേക്കും തള്ളിയിടാതെ സാമാന്യമര്യാദയോടും മനുഷ്യത്വത്തോടും കൂടി കേന്ദ്രസര്‍ക്കാര്‍ ക്രിയാത്മകമായി ഇടപെട്ട് പുതിയ കാര്‍ഷികബില്ലുകള്‍ പിന്‍വലിച്ച് കര്‍ഷകരെ രക്ഷിക്കണമെന്നും പാസ്റ്ററല്‍ കൗണ്‍സില്‍ ആവശ്യപ്പെട്ടു. അതിശൈത്യത്തേയും കൊറോണയേയും അതിജീവിച്ച് ഉത്തരവാദപ്പെട്ടവരുടെ കോര്‍പ്പറേറ്റ് അടിമത്തത്തേയും സന്ധിയില്ലാതെ സമരം ചെയ്യുന്ന കര്‍ഷക ജനതയുടെ ഈ ഐതിഹാസിക സമരത്തിനു ഇരിങ്ങാലക്കുട രൂപതയിലെ വിശ്വാസി സമൂഹം ഒന്നടങ്കം ഐക്യദാര്‍ഢ്യം പ്രഖ്യാപിക്കണമെന്നും പാസ്റ്ററല്‍ കൗണ്‍സില്‍ ആഹ്വാനം ചെയ്തു. യോഗത്തില്‍ ഇരിങ്ങാലക്കുട ബിഷപ് മാര്‍ പോളി കണ്ണൂക്കാടന്‍ അധ്യക്ഷത വഹിച്ചു. വികാരി ജനറാള്‍മാരായ മോണ്‍. ലാസര്‍ കുറ്റിക്കാടന്‍, മോണ്‍. ജോയ് പാല്യേക്കര, പാസ്റ്ററല്‍ കൗണ്‍സില്‍ വൈസ് പ്രസിഡന്റ് മോണ്‍. ജോസ് മഞ്ഞളി, പാസ്റ്ററല്‍ കൗണ്‍സില്‍ സെക്രട്ടറിമാരായ ഫാ. ജെയ്‌സണ്‍ കരിപ്പായി, ടെല്‍സണ്‍ കോട്ടോളി, പ്രഫ. ആനി ഫെയ്ത്ത്, അജണ്ട കമ്മിറ്റിയംഗം ഡേവിസ് ഊക്കന്‍ എന്നിവര്‍ പ്രസംഗിച്ചു.
About Author
കരുതിയിരിക്കുക, ഓണ്‍ലൈന്‍ തട്ടിപ്പുകളില്‍ വീഴരുതേ……ആദ്യം ഫോണ്‍ വിളി, താങ്ങളുടെ പേരില്‍ ക്രൈം കേസുകളുണ്ടെന്നു മുന്നറിയിപ്പ് 
മുനമ്പം ജനതയുടെ റവന്യൂ അവകാശങ്ങള്‍ പുന:സ്ഥാപിക്കും വരെ സമരം തുടരും സി.എല്‍.സി. 
മണ്ണിനടിയിലെ മൃതദേഹങ്ങള്‍ മണത്തറിയും; നായപരിശീലകര്‍ക്ക് പരിശീലനവുമായി കെ. നയന്‍ സ്‌ക്വാഡ് 
ഞാറ്ററിവിന്റെ പാഠങ്ങള്‍തേടി ഗവ. ഗേള്‍സ് ഹയര്‍ സെക്കന്‍ഡറി സ്‌ക്കൂളിലെ എന്‍എസ്എസ് വിദ്യാര്‍ഥികള്‍ 
ദേശീയ പല്ലാവൂര്‍ താള വാദ്യോത്സവത്തിന്റെ ഭാഗമായി നല്‍കുന്ന പുരസ്‌കാരങ്ങള്‍ പ്രഖ്യാപിച്ചു 
മുകുന്ദപുരം ചാലക്കുടി താലൂക്ക് തല വാരാഘോഷം ഉദ്ഘാടനം നടന്നു 
