അവശനിലയില്‍ കണ്ടെത്തിയ കുറുനരിയെ പിടികൂടി രക്ഷപ്പെടുത്തി

June 12, 2026

Social media

എടക്കുളം: അവശനിലയില്‍ കണ്ടെത്തിയ കുറുനരിയെ വനം വകുപ്പ് ഉദ്യോഗസ്ഥരെത്തി പിടികൂടി. എടക്കുളം മരപ്പാലത്തിന് സമീപമുള്ള അങ്കണവാടിക്ക് പിറകുവശത്തെ വീടിന് മുന്നില്‍ കിടന്നിരുന്ന കുറുനരിയെയാണ് ചാലക്കുടിയില്‍നിന്നുള്ള വനംവകുപ്പ് ഉദ്യോഗസ്ഥരെത്തി പിടികൂടിയത്. കടിയേറ്റ് നടക്കാന്‍ പോലും കഴിയാതെ അവശനിലയില്‍ കിടന്നിരുന്ന കുറുനരിയെ സമീപത്തെ കുട്ടികളാണ് കണ്ടത്.

വാര്‍ഡ് അംഗം കൂടിയായ പഞ്ചായത്ത് വൈസ് പ്രസിഡന്റ് കവിത സുരേഷിനെ വിവരമറിയിച്ചതിന്റെ അടിസ്ഥാനത്തില്‍ വനംവകുപ്പ് ഉദ്യോഗസ്ഥര്‍ സ്ഥലത്തെത്തി. തുടര്‍ന്ന് ചാലക്കുടി ഫോറസ്റ്റ് ഓഫീസര്‍ പ്രദീപ്, വാച്ചര്‍ ദീപു, ഡ്രൈവര്‍ ആദി എന്നിവര്‍ സ്ഥലത്തെത്തി കുറുനരിയെ പിടികൂടി കൂട്ടിലടച്ച് കൊണ്ടു പോകുകയായിരുന്നു. രാത്രിയുടെ മറവില്‍ മാലിന്യം തള്ളുന്നതിനാല്‍ പ്രദേശത്ത് കുറുനരികളുടേയും തെരുവുനായ്ക്കളുടേയും ശല്യം രൂക്ഷമാണെന്ന് പ്രദേശവാസികള്‍ പറഞ്ഞു. കഴിഞ്ഞ ഏപ്രിലില്‍ പഞ്ചായത്തിലെ ഒന്നാംവാര്‍ഡില്‍ മൂന്ന് കുട്ടികള്‍ക്ക് തെരുവുനായയുടെ കടിയേറ്റിരുന്നു.