കൂടല്‍മാണിക്യം ക്ഷേത്രോത്സവം: മാതൃക്കല്‍ ബലിദര്‍ശനത്തിന് വന്‍ ഭക്തജനത്തിരക്ക്
ഇരിങ്ങാലക്കുട: അത്യപൂര്‍വമായ ചടങ്ങുകളും ആചാരാനുഷ്ഠാനങ്ങളും കൂടല്‍മാണിക്യം ഉത്സവത്തിന്റെ പ്രത്യേകതയാണ്. കൂടല്‍മാണിക്യം ക്ഷേത്രത്തിലെ തിരുവുത്സവത്തോടനുബന്ധിച്ചുള്ള താന്ത്രികചടങ്ങുകളില്‍ പ്രധാനപ്പെട്ട ശ്രീഭൂതബലിയുടെ മാതൃക്കല്‍ ദര്‍ശനത്തിന് വന്‍ ഭക്തജനത്തിരക്ക്. രാവിലെ ശീവേലിക്കും വൈകീട്ട് വിളക്ക് എഴുന്നള്ളിപ്പിനുമായി ഭഗവാന്റെ തിടമ്പ് പുറത്തേക്കെഴുന്നള്ളിക്കുമ്പോഴാണ് മാതൃക്കല്‍ബലി ദര്‍ശന ചടങ്ങ് നടക്കുക. മറ്റ് ക്ഷേത്രങ്ങളില്‍ മാതൃക്കല്‍ ബലിക്ക് ഭക്തജനങ്ങളെ തൊഴാന്‍ അനുവദിക്കാറില്ല. എന്നാല്‍, ഇവിടെ മാതൃക്കല്‍ബലി തൊഴുന്നത് പരമ പുണ്യമാണെന്നാണ് സങ്കല്‍പ്പം. ദേവന്‍ ആദ്യമായി ശ്രീകോവിലില്‍നിന്ന് പുറത്തിറങ്ങുന്ന കൊടിപ്പുറത്ത് വിളക്കിനാണ് ആദ്യ മാതൃക്കല്‍ബലി. പകല്‍ ശീവേലിക്കും രാത്രി വിളക്കെഴുന്നള്ളിപ്പിനും ദേവനെ ആവാഹിച്ച് എഴുന്നള്ളിക്കുന്ന സമ്പ്രദായം കൂടല്‍മാണിക്യത്തിലെ അത്യപൂര്‍വ സവിശേഷതയാണ്. തനി സ്വര്‍ണത്തിലും വെള്ളിയിലും ഉള്ള നെറ്റിപ്പട്ടങ്ങളും ശാന്തി ശുദ്ധി സംരക്ഷിക്കാനായി തിടമ്പ് എഴുന്നള്ളിക്കുന്ന ആനയുടെ ഇരുഭാഗത്തും ഉള്ളാനകളെ നിര്‍ത്തുന്നതും ഇവിടുത്തെ മാത്രം പ്രത്യേകതയാണ്. മാതൃക്കല്‍ ബലിദര്‍ശനത്തിന് മഹാക്ഷേത്രങ്ങളില്‍ നടത്തുന്ന ഉത്സവബലികളുമായി സാമ്യമുണ്ട്. പീഠത്തില്‍ ഭഗവാന്റെ തിടമ്പ് എഴുന്നള്ളിച്ചുവയ്ക്കും. തുടര്‍ന്ന് തന്ത്രി ദേവാജ്ഞയനുസരിച്ച് മാതൃക്കളായ ബ്രാഹ്മണി, മഹേശ്വരി, കൗമാരി, വൈഷ്ണവി, വാരാഹി, ഇന്ദ്രാണി, ചാമുണ്ഡി എന്നീ സപ്തമാതൃക്കള്‍, മാതൃക്കള്‍, ലോക മാതൃക്കള്‍, സര്‍വ മാതൃക്കള്‍, സര്‍വമാതൃഗണങ്ങള്‍ എന്നിവരെയും ലോകത്തിലെ എല്ലാ ദിക്കുകളിലും വ്യാപിച്ചു കിടക്കുന്നവരും ഭൂമി, അന്തരീക്ഷം, ആകാശം (സ്വര്‍ഗം) എന്നിവിടങ്ങളില്‍ സ്ഥിതിചെയ്യുന്നവരുമായ എല്ലാ രൂപത്തിലുമുള്ള മാതൃക്കളുടെ ഗണങ്ങളെയും സമൂഹമായും പ്രത്യേകമായും സംഗമേശന്റെ ആജ്ഞയാല്‍ ആഹ്വാനം ചെയ്ത് ക്ഷണിച്ചുവരുത്തി മന്ത്രപുരസരം അതിവിശിഷ്ടമായ ഹവിസും മറ്റും നല്‍കുന്നു. ഇപ്രകാരം സൗമ്യരും സുപ്രസന്നരുമായി ഭവിക്കുന്ന മാതൃക്കളെ ലോകനന്മയ്ക്കായി പ്രാര്‍ത്ഥിച്ച് നമസ്‌കരിക്കും. ശ്രീസംഗമേശന്‍ തന്നെ നേരിട്ട് എഴുന്നള്ളിയിരുന്ന് ഈ ബലി നടത്തിക്കുന്നുവെന്നാണ് സങ്കല്‍പ്പം. ഈ സമയത്ത് ചെണ്ട, തിമില, കൊമ്പ്, കുഴല്‍ എന്നിവ ചേര്‍ന്നുള്ള വാദ്യം ഒരു പ്രത്യേക പവിത്രാന്തരീക്ഷമാണ സൃഷ്ടിക്കുക. ദേവന്റെയും എല്ലാ മാതൃക്കളുടെയും സംഗമസമയമാകയാല്‍ ആ സന്ദര്‍ഭത്തിലെ ദര്‍ശനം പാപഹരം കൂടിയാണെന്നാണ് വിശ്വാസം. അതുകൊ ണ്ടുതന്നെ ഈ ദര്‍ശനത്തിനായി നിരവധി ഭക്തജനങ്ങളാണ് ക്ഷേത്രസന്നിധിയില്‍ എത്തിച്ചേരുന്നത്. തുടര്‍ന്ന് വാതില്‍മാടത്തില്‍ ദേവീ സങ്കല്‍പത്തില്‍ ബലിതൂകി പുറത്തേക്കെഴുന്നള്ളിക്കുന്നു. മിക്ക ക്ഷേത്രങ്ങളിലും നിത്യശീവേലിക്ക് തിടമ്പ് പുറത്തേക്കെഴുന്നള്ളിക്കുമെങ്കിലും കൂടല്‍മാണിക്യം ക്ഷേത്രത്തില്‍ ഉത്സവകാലത്തുമാത്രമേ ദേവനെ പുറത്തേക്ക് എഴുന്നള്ളിക്കാറുള്ളൂ. അതുകൊണ്ടാണ് ഇവിടെ മാതൃക്കല്‍ ദര്‍ശനത്തിന് ഇത്രയും പ്രാധാന്യം.
കൂടല്‍മാണിക്യം കിഴക്കേ നട ഇരുട്ടിലാകാതിരിക്കാന്‍ ദേവസ്വം സത്വരം നടപടി എടുക്കണം: യുവകലാസാഹിതി
ഇരിങ്ങാലക്കുട: കൂടല്‍മാണിക്യം മൂന്നാം ഉത്സവ രാവില്‍ സന്ധ്യ മുതല്‍ ക്ഷേത്രം കിഴക്കേനടയില്‍ വെളിച്ചമില്ലായ്മ മൂലം ഭക്തര്‍ ബുദ്ധിമുട്ടി. അലങ്കാരപ്പന്തലും ദീപാലങ്കാരവും നടത്താന്‍ കരാര്‍ എടുത്തവരുടെ ഭാഗത്ത് നിന്നാണ് വീഴ്ചയെങ്കില്‍ കരാറുകാര്‍ക്കെതിരെ ശക്തമായ നടപടിക്ക് ദേവസ്വം തയ്യാറാകണ. കൂടാതെ ഭക്തര്‍ക്കും ഉത്സവത്തിനും എത്തുന്നവര്‍ക്ക് ബുദ്ധിമുട്ടുണ്ടാകാതെ സമാന്തരമായി വെളിച്ചമുണ്ടാകുന്നു എന്ന് ദേവസ്വം ഉറപ്പുവരുത്തണം എന്നും യുവകലാസാഹിതി ഇരിങ്ങാലക്കുട മണ്ഡലം കമ്മിറ്റി യോഗം ഏകകണ്ഠമായി അഭിപ്രായപ്പെട്ടു. നല്ല തിരക്കുള്ള സമയത്ത് ക്ഷേത്രത്തിലേക്ക് പ്രവേശിക്കുന്നയിടത്ത് ചിലരുടെ വാഹനങ്ങള്‍ പാര്‍ക്ക് ചെയ്യാന്‍ അനുവദിക്കുന്ന പ്രവണതയും ഭക്തര്‍ക്ക് വലിയ ബുദ്ധിമുട്ടുണ്ടാക്കുന്നുവെന്ന് യോഗം വിലയിരുത്തി. പ്രസിഡന്റ് കെ.കെ. കൃഷ്ണാനന്ദ ബാബുവിന്റെ അധ്യക്ഷതയില്‍ ചേര്‍ന്ന യോഗത്തില്‍ സെക്രട്ടറി അഡ്വ. രാജേഷ് തമ്പാന്‍, വി.എസ്. വസന്തന്‍, കെ.സി. ശിവരാമന്‍, റഷീദ് കാറളം, പി.കെ. സദാനന്ദന്‍, വി.പി. അജിത് കുമാര്‍ എന്നിവര്‍ സംസാരിച്ചു.
സേവാഭാരതിയുടെ നേതൃത്വത്തില്‍ സംഭാര വിതരണം നടന്നു
ഇരിങ്ങാലക്കുട: കൂടല്‍മാണിക്യം ക്ഷേത്രം തിരുവുത്സവത്തോടനുബന്ധിച്ച് ഇരിങ്ങാലക്കുട സേവാഭാരതി നടത്തി വരുന്ന സംഭാര വിതരണം കൂടല്‍മാണിക്യം ദേവസ്വം ചെയര്‍മാന്‍ അഡ്വ. സി.കെ. ഗോപി നിര്‍വഹിച്ചു. മാനേജിംഗ് ദേവസ്വം കമ്മിറ്റി മെമ്പര്‍ രാഘവന്‍, സേവാഭാരതി പ്രസിഡന്റ് നളിന്‍ ബാബു, പി.കെ. ഉണ്ണികൃഷ്ണന്‍, അംഗങ്ങളായ ഡി.പി.നായര്‍, ഉണ്ണി പേടിക്കാട്ടില്‍, രവീന്ദ്രന്‍ കാക്കര, ശിവദാസ് പള്ളിപ്പാട്ട്, ഐ.കെ. ശിവാനന്ദന്‍, പ്രകാശന്‍ കൈമാപ്പറമ്പില്‍, ടി.യു. രാജേഷ്, സുധാകരന്‍, രാമന്‍ എന്നിവര്‍ നേതൃത്വം നല്‍കി.
About Author
നവീകരിച്ച ഇരിങ്ങാലക്കുട ക്രൈസ്റ്റ് ആശ്രമദേവാലയത്തിന്റെ വെഞ്ചിരിപ്പ് നിര്‍വഹിച്ചു 
ടൗണ്‍ അമ്പ് ഫെസ്റ്റ് 2025 സ്വാഗത സംഘം ഓഫീസ് ഉദ്ഘാടനം ചെയ്തു 
ക്രൈസ്റ്റ് ആശ്രമ ദേവാലയത്തില്‍ ക്രിസ്തുരാജന്റെ തിരുനാളിന് കൊടിയേറി 
മുനമ്പം ജനതയുടെ റവന്യൂ അവകാശങ്ങള്‍ പുന:സ്ഥാപിക്കും വരെ സമരം തുടരും സി.എല്‍.സി. 
ഇരിങ്ങാലക്കുട രൂപത കെസിവൈഎമ്മിന്റെ നേതൃത്വത്തില്‍ വനിത സംഗമം നടന്നു 
തുറവന്‍കുന്ന് സെന്റ് ജോസഫ് ഇടവക കത്തോലിക്ക കോണ്‍ഗ്രസിന്റെയും മാതൃ സംഘത്തിന്റെയും നേതൃത്വത്തില്‍ അമ്മക്കൊരു പൂചെണ്ട് 
