മൃച്ഛകടികം കൂടിയാട്ടത്തോടെ ദശരൂപകമഹോത്സവം സമാപിച്ചു

July 15, 2026

Social media

ഇരിങ്ങാലക്കുട: അമ്മന്നൂര്‍ ഗുരുകുലത്തിലെ മാധവനാട്യഭൂമിയില്‍ പന്ത്രണ്ടുദിവസമായി നടന്നുവന്നിരുന്ന ഗുരുസ്മരണദശരൂപക മഹോത്സവം വേണുജി സംവിധാനം ചെയ്ത മൃച്ഛകടികം കൂടിയാട്ടത്തോടെ സമാപിച്ചു. കൂടിയാട്ട അവതരണത്തിന് മുന്‍പ് ഡോ. ഇ.ആര്‍. നാരായണന്‍ പ്രകരണങ്ങളെ സംബന്ധിച്ച് പ്രഭാഷണം നടത്തി. തുടര്‍ന്ന് നടന്ന കൂടിയാട്ടത്തില്‍ വസന്തസേനയായി കപില വേണുവും ചാരുദത്തനായി സൂരജ് നമ്പ്യാരും മാഥുരനായി മാര്‍ഗി സജീവ് നാരായണചാക്യാരും കര്‍ണ്ണപൂരകനായി പൊതിയില്‍ രഞ്ജിത് ചാക്യാരും മൈത്രേയനായി കലാമണ്ഡലം ജിഷ്ണു പ്രതാപും

ശര്‍വ്വിലകനായി നേപത്ഥ്യ ശ്രീഹരി ചാക്യാരും സംവാഹകനായി ശങ്കര്‍ വെങ്കിടേശ്വരനും അഹിന്തനായി ഗുരുകുലം തരുണും മദനികയായി സരിത കൃഷ്ണകുമാറും രദനികയായി മാര്‍ഗി അഞ്ജന എസ് ചാക്യാരും രോഹസേനനായി അരന്‍ കപിലയും രംഗത്തെത്തി. മിഴാവില്‍ കലാമണ്ഡലം രാജീവ്, കലാമണ്ഡലം ഹരിഹരന്‍, കലാമണ്ഡലം നാരായണന്‍ നമ്പ്യാര്‍, കലാമണ്ഡലം വിനീഷ് എന്നിവരും ഇടക്കയില്‍ കലാനിലയം ഉണ്ണികൃഷ്ണന്‍ താളത്തിന് ഗുരുകുലം അതുല്യ, ഗുരുകുലം അക്ഷര, ഗുരുകുലം ഗോപിക എന്നിവരും കുറുംകുഴലില്‍ വൈശാഖ് ചമയത്തിന് കലാനിലയം ഹരിദാസ് കലാമണ്ഡലം വൈശാഖ് എന്നിവര്‍ പങ്കെടുത്തു. ജനപങ്കാളിത്തം കൊണ്ടും കഥകളുടെയും വേഷങ്ങളുടേയും വൈവിധ്യം കൊണ്ടും സവിശേഷമായിരുന്നു ദശരൂപകമഹോത്സവം.