സിബിഐ ഉദ്യോഗസ്ഥന്‍ ചമഞ്ഞ് വീട്ടമ്മയില്‍ നിന്ന് എട്ടുലക്ഷം തട്ടിയ കേസിലെ പ്രതി അറസ്റ്റില്‍

January 9, 2026

Social media

ഇരിങ്ങാലക്കുട: സിബിഐ ഉദ്യോഗസ്ഥന്‍ ചമഞ്ഞ് വീട്ടമ്മയില്‍ നിന്ന് എട്ടുലക്ഷം തട്ടിയ കേസിലെ പ്രതിയെ മംഗളൂരു വിമാനത്താവളത്തില്‍ നിന്നും ലുക്കൗട്ട് സര്‍ക്കുലര്‍ പ്രകാരം പിടികൂടി. കാസര്‍ഗോഡ് കാഞ്ഞങ്ങാട് സ്വദേശി പാമ്പു വീട്ടില്‍ ഫര്‍ഷാദ് (24) നെയാണ് അറസ്റ്റ് ചെയ്തത്. പുല്ലൂര്‍ പുളിഞ്ചോട് സ്വദേശിയായ വീട്ടമ്മയെ മൊബൈല്‍ ഫോണില്‍ വിളിച്ച് മുംബൈ പോലീസിലെ സിബിഐ ഇന്‍വെസ്റ്റിഗേഷന്‍ ഓഫീസര്‍ ആണെന്ന് പറഞ്ഞ് വിശ്വസിപ്പിച്ച് ആള്‍മാറാട്ടം നടത്തി വീട്ടമ്മയുടെ ആധാര്‍ നമ്പര്‍ നിയമവിരുദ്ധമായി ഉപയോഗിക്കുന്നുവെന്നും ആയതിന് എഫ്‌ഐആര്‍ രജിസ്റ്റര്‍ ചെയ്തിട്ടുണ്ടെന്നും പറഞ്ഞ് ആയതിന്റെ തെളിവിലേക്കായി സുപ്രീം കോടതിയുടെ എഫ്‌ഐആര്‍ ആണെന്ന് പറഞ്ഞ് വെബ്‌സൈറ്റ് വഴി വ്യാജ എഫ്‌ഐആര്‍ അയച്ച് നല്‍കി വിശ്വസിപ്പിച്ച് പരാതിക്കാരിയുടെ ബാങ്ക് അക്കൗണ്ടിലെ പണം വെരിഫൈ ചെയ്യാന്‍ ആണെന്നും പറഞ്ഞ് ബാങ്ക് അക്കൗണ്ടുകള്‍ മുഖേന എട്ടു ലക്ഷം രൂപ തട്ടിയെടുക്കുകയായിരുന്നു.

തട്ടിപ്പ് നടത്തിയ പണത്തില്‍ നിന്ന് 4,90,000 (നാല് ലക്ഷത്തി തൊണ്ണൂറായിരം രൂപ) സ്വന്തം ബാങ്ക് അക്കൗണ്ടിലേക്ക് അയച്ച് വാങ്ങി തട്ടിപ്പ് സംഘത്തില്‍ ഉള്‍പ്പെട്ടതിനാണ് ഫര്‍ഷാദ്‌നെ അറസ്റ്റ് ചെയ്തത്. കേസില്‍ ഉള്‍പ്പെട്ടതിന് ശേഷം വിദേശത്തേക്ക് കടന്ന പ്രതിയെ അബുദാബിയില്‍ നിന്നും രഹസ്യമായി നാട്ടിലേക്ക് മടങ്ങി വരുന്നതിനായി മാംഗ്ലൂര്‍ എയര്‍പോര്‍ട്ടില്‍ വന്നിറങ്ങിയപ്പോഴാണ് ലുക്കൗട്ട് സര്‍ക്കുലര്‍ പ്രകാരം എമിഗ്രേഷന്‍ ഉദ്യോഗസ്ഥര്‍ തടഞ്ഞ് വച്ചത്.

തുടര്‍ന്ന് ഈ വിവരം തൃശൂര്‍ റൂറല്‍ ജില്ലാ പോലീസ് മേധാവിയെ അറിയിക്കുകയായിരുന്നു. ജില്ലാ പോലീസ് മേധാവിയുടെ നേതൃത്വത്തിലുള്ള അന്വേഷണ സംഘത്തെ മാംഗ്ലൂര്‍ എയര്‍പോര്‍ട്ടിലേക്ക് അയക്കുകയും പ്രതിയെ ചെയ്ത് അറസ്റ്റ് ചെയ്ത് ഇരിങ്ങാലക്കുട പോലീസ് സ്റ്റേഷനില്‍ എത്തിക്കുകയുമായിരുന്നു. ഇരിങ്ങാലക്കുട പോലീസ് സ്റ്റേഷന്‍ എസ്എച്ച്ഒ എം.കെ. ഷാജി, ജിഎസ്‌ഐ എം.എ. മുഹമ്മദ് റാഷി, ജിഎസ്‌സിപിഒ എം.ആര്‍. രഞ്ജിത്ത്, സിപിഒ മാരായ എം.എം. ഷാബു, മുരളികൃഷ്ണ എന്നിവരാണ് അന്വേഷണ സംഘത്തിലുണ്ടായിരുന്നത്.