യുവാവിനെ അക്രമിച്ച് കാറും പണവും വെളിച്ചെണ്ണയും കവര്‍ന്ന കേസില്‍ മുഖ്യപ്രതി അറസ്റ്റില്‍

August 10, 2023

Social media

ഇരിങ്ങാലക്കുട: യുവാവിനെ വധിക്കാന്‍ ശ്രമിച്ച് കാറും 38650 രൂപയും 61 ബോട്ടില്‍ വെളിച്ചെണ്ണയും കവര്‍ന്ന കേസിലെ മുഖ്യപ്രതി അറസ്റ്റില്‍. ഇരിങ്ങാലക്കുട പുതുക്കാട്ടില്‍ സഞ്ജു (25) വാണ് അറസ്റ്റിലായത്. കഴിഞ്ഞ നാലിനാണ് കേസിനാസ്പദമായ സംഭവം. എസ്എന്‍ പുരം സ്വദേശിയായ യുവാവിനെ കെട്ടുച്ചിറ കളളുഷാപ്പിനു സമീപം വച്ചാണ് പ്രതികളായ സംഘം വധിക്കാന്‍ ശ്രമിച്ച് കാറും രൂപയും വെളിച്ചെണ്ണയും കവര്‍ന്നത്. പ്രതികള്‍ എല്ലാവരും മദ്യത്തിനും മയക്കുമരുന്നിനും അടിമകളാണ്. സംഭവത്തിന് ശേഷം പ്രതികള്‍ പല വഴിക്ക് പിരിഞ്ഞ് ഒളിവില്‍ കഴിയുകയായിരുന്നു. അങ്കമാലിയിലെ സഞ്ജുവിന്‍റെ ബന്ധുവീട്ടില്‍ നിന്നാണ് പോലീസ് പ്രതിയെ പിടികൂടിയത്. ഈ കേസില്‍ ഉള്‍പ്പെട്ട മറ്റു പ്രതികളുടെ ഒളിവില്‍ കഴിയുന്ന സ്ഥലത്തെ പറ്റി പോലീസിന് സൂചന ലഭിച്ചിട്ടുണ്ട്. ഇരിങ്ങാലക്കുട ഡിവൈഎസ്പി ടി.കെ. ഷൈജുവും സി.ഐ. അനിഷ് കരീമും സംഘവും ചേര്‍ന്നാണ് പ്രതിയെ അറസ്റ്റ് ചെയ്തത്. അന്വേഷണ സംഘത്തില്‍ എസ്ഐമാരായ എം.എസ്. ഷാജന്‍, എന്‍.കെ. അനില്‍ കുമാര്‍, കൃഷ്ണപ്രസാദ്, ജയകൃഷ്ണന്‍, ഉദ്യോഗസ്ഥരായ സൂരജ്‌ദേവ്, ഉമേഷ്, മിഥുന്‍ കൃഷ്ണ എന്നിവരും ഉണ്ടായിരുന്നു.