മാര്‍ക്കറ്റിലെ മാംസ വില്പനയെ ചൊല്ലി കൗണ്‍സില്‍ യോഗത്തില്‍ ബഹളം, വോട്ടെടുപ്പ്
മാര്‍ക്കറ്റിലെ മാംസ വില്പനയുമായി ബന്ധപ്പെട്ട വിഷയം വോട്ടിനിട്ടപ്പോൾ
ഇരിങ്ങാലക്കുട: മാര്‍ക്കറ്റിലെ മാംസ വില്പനയെ ചൊല്ലി കൗണ്‍സില്‍ യോഗത്തില്‍ വീണ്ടും ബഹളം. കഴിഞ്ഞ കൗണ്‍സില്‍ യോഗത്തില്‍ ഏറെ വാക്കു തര്‍ക്കങ്ങള്‍ക്കൊടുവില്‍ മാറ്റി വച്ച അജണ്ട വീണ്ടും ഇന്നലെ നടന്ന കൗണ്‍സില്‍ യോഗത്തില്‍ ചര്‍ച്ചക്കെടുത്തപ്പോഴാണ് കൗണ്‍സിലര്‍മാര്‍ തമ്മില്‍ വാക്കേറ്റം നടന്നത്. പുതുക്കാടന്‍ വീട്ടില്‍ ബിനോയ് മാര്‍ക്കറ്റിനു സമീപം മാംസവില്പന നടത്തുന്നതിന് നഗരസഭയില്‍ ലൈസന്‍സിനായി അപേക്ഷ നല്‍കിയിരുന്നു. മതിയായ രേഖകള്‍ ഹാജരാക്കിയില്ലെന്ന കാരണത്താല്‍ ലൈസന്‍സ് നല്‍കിയിരുന്നില്ലെന്നും അതിനാല്‍ ഈ സ്ഥാപനത്തിന്റെ പ്രവര്‍ത്തനം നിര്‍ത്തിവയ്ക്കുന്നതുമായി സംബന്ധിച്ചാണ് ചര്‍ച്ച നടന്നത്.
അജണ്ട വായിച്ചതോടെ ഇക്കാര്യത്തില്‍ തീരുമാനമെടുക്കുവാന്‍ ആരോഗ്യ സ്റ്റാന്റിംഗ് കമ്മിറ്റിയെ ചുമതലപ്പെടുത്തിയതായി ചെയര്‍പോഴ്‌സണ്‍ അറിയിച്ചു. എന്നാല്‍ ഇക്കാര്യത്തില്‍ തീരുമാനമെടുക്കുവാന്‍ ആരോഗ്യ സ്റ്റാന്റിംഗ് കമ്മിറ്റിക്ക് കഴിയില്ലെന്നും കൗണ്‍സിലില്‍ ഈക്കാര്യം ചര്‍ച്ചചെയ്തു തീരുമാനമാക്കണമെന്നും ബിജെപിയും എല്‍ഡിഎഫും ഉന്നയിച്ചു. രണ്ടു നീതിയാണ് ഈ വിഷയത്തില്‍ നടപ്പിലാക്കുവാന്‍ ശ്രമിക്കുന്നതെന്നും വ്യാപാര സ്ഥാപനങ്ങള്‍ അടച്ചുപൂട്ടുന്ന നടപടികളില്‍ നിന്നും ഭരണ നേതൃത്വം പിന്മാറണമെന്നും എല്‍ഡിഎഫ് ആവശ്യപ്പട്ടു.
മാംസവ്യാപരം നടത്തുന്നതിനു ബിനോയ് നല്‍കിയ അപേക്ഷ മാത്രം നിരസിക്കുന്നതു ശരിയല്ല. അറവുശാല തുറക്കുന്നതിനു ആവശ്യമായ നടപടികള്‍ സ്വീകരിക്കേണ്ടത് നഗരസഭയാണ്. മാര്‍ക്കറ്റിനുള്ളില്‍ മാംസ വ്യാപാരത്തിനു സോണുകള്‍ തിരിച്ചതിനു ശേഷം ഇക്കാര്യത്തില്‍ നടപടി സ്വീകരിച്ചാല്‍ മതിയെന്നും ലൈസന്‍സ് പുതുക്കുന്നതിനു അപേക്ഷ നല്‍കുമ്പോള്‍ മാംസ വ്യാപാരികള്‍ നല്‍കുന്ന രേഖകള്‍ കൃത്യമായി പരിശോധിക്കണമെന്നും എല്‍ഡിഎഫ് കൗണ്‍സിലര്‍മാരായ അഡ്വ. കെ.ആര്‍. വിജയ, സി.സി. ഷിബിന്‍ എന്നിവര്‍ ആവശ്യപ്പെട്ടു.
മാര്‍ക്കറ്റിനു പുറത്ത് മാംസ വ്യാപാരം നടത്തുന്നതു അംഗീകരിക്കുവാന്‍ സാധിക്കില്ലെന്നും മാര്‍ക്കറ്റിനുള്ളില്‍ മുറി നല്‍കി വ്യാപാരം നടത്തുവാന്‍ ബിനോയിയെ അനുവദിക്കണമെന്നും ബിജെപി കൗണ്‍സിലര്‍മാരായ സന്തോഷ് ബോബന്‍, ടി.കെ. ഷാജു എന്നിവര്‍ പറഞ്ഞു. ഇക്കാര്യത്തില്‍ കൗണ്‍സിലര്‍മാര്‍ തമ്മില്‍ ഏറെ നേരം വാക്കേറ്റം നടന്നു. അറവുശാലകള്‍ ഇല്ലാത്ത സാഹചര്യത്തില്‍ നിബന്ധനകള്‍ക്ക് വിധോയമായി മാത്രേ മാംസ വ്യാപാരത്തിന് അനുമതിപത്രം നല്‍കാനാകൂ എന്ന് സെക്രട്ടറി പറഞ്ഞു. ലൈസന്‍സിനു അപേക്ഷ നല്‍കിയപ്പോള്‍ മതിയായ രേഖകള്‍ ഇല്ലാത്തതാണ് ബിനോയ്ക്കു ലൈസന്‍സ് നല്‍കാതിരുന്നതെന്നും ഇക്കാര്യത്തില്‍ കൗണ്‍സിലില്‍ നയപരമായ തീരുമാനങ്ങള്‍ ഉണ്ടാകണമെന്നും സെക്രട്ടറി പറഞ്ഞു.
പല മാംസ വ്യാപാര സ്ഥാപനങ്ങളും മതിയായ രേഖകളില്ലാതെയാണ് പ്രവര്‍ത്തിക്കുന്നതെന്നും ഇക്കാര്യത്തില്‍ വോട്ടെടുപ്പ് വേണമെന്നും എല്‍ഡിഎഫ് ആവശ്യപ്പട്ടു. യുഡിഎഫ്, ബിജെപി കൗണ്‍സിലര്‍മാര്‍ ബിനോയ് നല്‍കിയ അപ്പീല്‍ തള്ളുന്നതിന് അനുകൂലമായി വോട്ട് രേഖപ്പെടുത്തി. ഇക്കാര്യത്തില്‍ മാര്‍ക്കറ്റ് വാര്‍ഡ് കൗണ്‍സിലര്‍ അടക്കമുള്ളവരുടെ നിലപാട് വോട്ടെടുപ്പോടെ വ്യക്തമായെന്ന് അഡ്വ. കെ.ആര്‍. വിജയ പറഞ്ഞു. നിരവധി പരാതികളെ തുടര്‍ന്ന് ക്രൈസ്റ്റ് കോളജിനു മുന്നില്‍, പ്രവര്‍ത്തിക്കുന്ന കെഎല്‍ -45 കഫേ സ്ഥാപനത്തിന്റെ ലൈസന്‍സ് റദ്ദാക്കിയതിനു ശേഷം വീണ്ടും പ്രവര്‍ത്തിപ്പിക്കുന്നതു സംബന്ധിച്ച് ആരോഗ്യ വിഭാഗവും എന്‍ജിനീയിംഗ് വിഭാഗവും വാര്‍ഡ് കൗണ്‍സിലറും ചേര്‍ന്ന് 15 ദിവസത്തിനകം നടപടി സ്വീകരിക്കുവാന്‍ കൗണ്‍സില്‍ നിര്‍ദേശിച്ചു. യോഗത്തില്‍ ചെയര്‍പേഴ്‌സണ്‍ സുജ സഞ്ജീവ്കുമാര്‍ അധ്യക്ഷതവഹിച്ചു.
About Author
കരൂപ്പടന്ന എന്‍എസ്എസ് വളണ്ടിയര്‍മാര്‍ പല്ലൊട്ടി സിനിമയുടെ അണിയറ പ്രവര്‍ത്തകരുമായി സംവദിച്ചു 
വാര്‍ഡ് വിഭജനം; കരട് വിജ്ഞാപനമായി; ഇരിങ്ങാലക്കുട നഗരസഭയില്‍ ഇനി 43 വാര്‍ഡുകള്‍ 
കരുതിയിരിക്കുക, ഓണ്‍ലൈന്‍ തട്ടിപ്പുകളില്‍ വീഴരുതേ……ആദ്യം ഫോണ്‍ വിളി, താങ്ങളുടെ പേരില്‍ ക്രൈം കേസുകളുണ്ടെന്നു മുന്നറിയിപ്പ് 
ടൗണ്‍ അമ്പ് ഫെസ്റ്റ് 2025 സ്വാഗത സംഘം ഓഫീസ് ഉദ്ഘാടനം ചെയ്തു 
നഗരസഭയുടെ ഭരണപരാജയം; ആം ആദ്മി പാര്‍ട്ടി പന്തംകൊളുത്തി പ്രകടനം നടത്തി 
പിടികിട്ടാപ്പുള്ളി 26 വര്‍ഷത്തിന് ശേഷം അറസ്റ്റില്‍ 
