ഓണ്ലൈന് ട്രേഡിംഗ് തട്ടിപ്പ്; പ്രതി അറസ്റ്റില്

നസീബ്.
ഇരിങ്ങാലക്കുട: ഓണ്ലൈന് ഷെയര് ട്രേഡിംഗിലൂടെ ഉയര്ന്ന ലാഭം വാഗ്ദാനം ചെയ്ത് പത്ത് ലക്ഷം രൂപ തട്ടിയെടുത്ത കേസില് പ്രതിയെ അറസ്റ്റ് ചെയ്തു. ആലപ്പുഴ മണ്ണംഞ്ചേരി സ്വദേശി പനയില് വീട്ടില് നസീബ് (29) നെയാണ് അറസ്റ്റ് ചെയ്തത്. തൃശൂര് റൂറല് ജില്ലാ പോലീസ് മേധാവി ബി. കൃഷ്ണകുമാര് ഐപിഎസ് ന്റെ നേതൃത്വത്തിലുള്ള അന്വേഷണ സംഘം എറണാംകുളം കുമ്പളങ്ങിയില് നിന്നാണ് പ്രതിയെ അറസ്റ്റ് ചെയ്തത്. ഇരിങ്ങാലക്കുട കാരുകളങ്ങര സ്വദേശി കൊളക്കാട്ടില് വീട്ടില് രാഗേഷ് (37) എന്നയാളാണ് തട്ടിപ്പിനിരയായത്. വാട്സ്ആപ്പില് ലഭിച്ച സന്ദേശം വിശ്വസിച്ച് പ്രതികള് നല്കിയ ലിങ്കില് ക്ലിക്ക് ചെയ്ത രാഗേഷ് ഒരു ടെലിഗ്രാം ഗ്രൂപ്പില് അംഗമായി.
ഈ ഗ്രൂപ്പിലൂടെ ലഭിച്ച നിര്ദേശങ്ങള് അനുസരിച്ച് വെബ്സൈറ്റില് ട്രേഡിംഗ് നടത്തിയ രാഗേഷില് നിന്ന് പല തവണകളായി 10,01,780 രൂപയാണ് പ്രതികള് കൈക്കലാക്കിയത്. ട്രേഡിംഗ് സൈറ്റില് 15 ലക്ഷം രൂപ ബാലന്സ് ഉള്ളതായി കാണിച്ചെങ്കിലും ഈ പണം പിന്വലിക്കാന് ശ്രമിച്ചപ്പോള് കഴിഞ്ഞില്ല. ഇക്കാര്യം ടെലിഗ്രാം വഴി അറിയിച്ചപ്പോള്, പണം പിന്വലിക്കാന് ടാക്സ് ഇനത്തില് 6 ലക്ഷം രൂപ കൂടി ആവശ്യപ്പെട്ടതോടെയാണ് തട്ടിപ്പാണെന്ന് രാഗേഷിന് മനസ്സിലായത്.
തട്ടിപ്പ് പണം കൈമാറ്റം ചെയ്യുന്നതിനായി സ്വന്തം ബാങ്ക് അക്കൗണ്ട് പ്രധാന പ്രതികള്ക്ക് നല്കി പതിനായിരം രൂപ കമ്മീഷന് കൈപ്പറ്റി തട്ടിപ്പ് സംഘത്തില് ഉള്പ്പെട്ടതിനാണ് നസീബിനെ ഈ കേസില് പ്രതി ചേര്ത്തത്. നസീബിന്റെ ബാങ്ക് അക്കൗണ്ട് മുഖേന രാഗേഷില് നിന്ന് തട്ടിയെടുത്ത പണത്തില് നിന്ന് അഞ്ച് ലക്ഷത്തി എണ്ണായിരത്തി അറുനൂറ് രൂപയാണ് കൈമാറ്റം ചെയ്തത്. ഇരിങ്ങാലക്കുട പോലീസ് സ്റ്റേഷന് എസ്എച്ച്ഒ കെ.ജെ. ജിനേഷ്, ജിഎസ്ഐ എം.എ. മുഹമ്മദ് റാഷി, ജിഎഎസ്ഐ കെ.കെ. പ്രകാശന്, ജിഎസ് സിപിഒ എം.എസ്. സുജിത്ത് എന്നിവരാണ് പ്രതിയെ അറസ്റ്റ് ചെയ്ത അന്വേഷണ സംഘത്തിലുണ്ടായിരുന്നത്.