ആധുനിക അറവുശാലക്ക് അനുസൃതമായ രീതിയില്‍ കെട്ടിടം നിര്‍മിക്കുന്നതിന് കൗണ്‍സില്‍ തീരുമാനം
ഇരിങ്ങാലക്കുട: നഗരസഭയിലെ നിലവിലെ അറവുശാല കെട്ടിടം പൊളിച്ച് ആധുനിക അറവുശാലക്കു അനുസൃതമായ രീതിയില്‍ കെട്ടിടം നിര്‍മിക്കുന്നതിനു ഡിപിആര്‍ തയാറാക്കി കിഫ്ബി സമര്‍പ്പിക്കുവാന്‍ മുനിസിപ്പല്‍ കൗണ്‍സില്‍ യോഗം തീരുമാനിച്ചു. അറവുശാല നിര്‍മിക്കുന്നതിനു ഡിപിആര്‍ തയാറാക്കുന്നതിനു ചുമതലപ്പെടുത്തിയ ഏജന്‍സി സ്ഥല പരിശോധന നടത്തിയതില്‍ ആധുനിക അറവുശാല നിര്‍മിക്കുന്നതിനു നിലവിലുള്ള കെട്ടിടം അപര്യാപ്തമാണന്നു കണ്ടെത്തിയതിന്റെ അടിസ്ഥാനത്തിലാണു തീരുമാനം. ആധുനിക അറവുശാല നിര്‍മിക്കുന്നതു ആവശ്യമാണന്നും എന്നാല്‍ സ്റ്റാന്‍ഡിംഗ് കമ്മിറ്റികള്‍ ചര്‍ച്ച ചെയ്യാതെയാണു കൗണ്‍സില്‍ യോഗത്തില്‍ അജണ്ടയായി വന്നതെന്നും ആരോഗ്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ അംബിക പള്ളിപ്പുറത്ത് ചൂണ്ടിക്കാട്ടി. ഇത്തരം അജണ്ടകള്‍ സ്റ്റാന്‍ഡിംഗ് കമ്മിറ്റികളില്‍ ചര്‍ച്ച നടത്തി വേണം കൗണ്‍സില്‍ യോഗങ്ങളില്‍ അജണ്ടയായി വരേണ്ടതെന്നു ക്ഷേമകാര്യ സ്റ്റാന്‍ഡിംഗ് കമ്മിറ്റി ചെയര്‍മാന്‍ സി.സി. ഷിബിനും ആവശ്യപ്പെട്ടു. എന്നാല്‍ കഴിഞ്ഞ പത്തു വര്‍ഷത്തിനകം ലക്ഷങ്ങളാണു നഗരസഭ അറവുശാലയ്ക്കായി ചെലവഴിച്ചിട്ടുള്ളതെന്നു ബിജെപി അംഗം സന്തോഷ് ബോബന്‍ ചൂണ്ടിക്കാട്ടി. നിലവിലെ കെട്ടിടം പൊളിച്ചു മാറ്റേണ്ടതില്ല. അറവുശാലയുമായി ബന്ധപ്പെട്ട് നിലവിലുള്ള കേസുകള്‍ തീര്‍പ്പാക്കണമെന്നാവശ്യപ്പെട്ട സന്തോഷ് ബോബന്‍ പരിസരവാസികളുടെ ആശങ്ക പരിഗണിച്ച് അറവുശാലയ്ക്കു പുതിയ സ്ഥലം കണ്ടെത്തെണമെന്നാവശ്യപ്പെട്ടു. പരിസരവാസികള്‍ക്കു യാതൊരു ബുദ്ധിമുട്ടും ഉണ്ടാകാത്ത രീതിയിലാണു ആധുനിക അറവുശാല നിര്‍മിക്കുന്നതെന്നു മുനിസിപ്പല്‍ ചെയര്‍പേഴ്‌സണ്‍ സോണിയഗിരി പറഞ്ഞു. നിലവിലുള്ള കെട്ടിടത്തിനു 15 വര്‍ഷത്തെ പഴക്കമുള്ളതിനാലാണു പൊളിച്ചു നീക്കി പുതിയ കെട്ടിടം നിര്‍മിക്കുന്നതെന്നും ചെയര്‍പേഴ്‌സണ്‍ സോണിയഗിരി വിശദീകരിച്ചു. ശുദ്ധജല ക്ഷാമം പരിഹരിക്കുന്നതുമായി ബന്ധപ്പെട്ട് മുനിസിപ്പല്‍ കൗണ്‍സിലര്‍മാരുടെയും, വാട്ടര്‍ അഥോറിറ്റി ജീവനക്കാരുടെയും സംയുക്ത യോഗം വിളിച്ചു ചേര്‍ക്കണമെന്നു എല്‍ഡിഎഫ് പാര്‍ലമെന്ററി പാര്‍ട്ടി ലീഡര്‍ അഡ്വ. കെ.ആര്‍. വിജയ ആവശ്യപ്പെട്ടു. പൊതുമരാമത്ത് സ്റ്റാന്‍ഡിംഗ് കമ്മിറ്റിയെ നോക്കുകുത്തിയാക്കിയാണു തെരുവു വിളക്കുകളുടെ അറ്റകുറ്റപണി നടക്കുന്നതെന്നു ബിജെപി പാര്‍ലമെന്ററി പാര്‍ട്ടി ലീഡര്‍ സന്തോഷ് ബോബന്‍ കുറ്റപ്പെടുത്തി. ഇപ്പോള്‍ നടന്നു വരുന്ന പ്രവര്‍ത്തനങ്ങള്‍ ശരിയായ രീതിയിലല്ലെന്നും സന്തോഷ് ബോബന്‍ പറഞ്ഞു. എന്നാല്‍ കൗണ്‍സില്‍ അധികാരമേറ്റയുടന്‍ തെരുവു വിളക്കുകളുമായി ബന്ധപ്പെട്ട് നിരവധി പരാതികള്‍ ഉയര്‍ന്ന സാഹചര്യത്തിലാണു താന്‍ നേരിട്ട് നേതൃത്വം നല്‍കിയതെന്നും അറ്റകുറ്റപണി സംബന്ധിച്ച യാതൊരു പരാതിയും ഇതുവരെ ഉയര്‍ന്നിട്ടില്ലെന്നും ചെയര്‍പേഴ്‌സണ്‍ സോണിയഗിരി ചൂണ്ടിക്കാട്ടി. മുനിസിപ്പല്‍ ലൈസന്‍സ് ഫീസ് പുനര്‍നിര്‍ണയിച്ചപ്പോള്‍ ഏറ്റവും ചുരുങ്ങിയ തുക 500 രൂപയാക്കിയതു നാമമാത്ര കച്ചവടക്കാര്‍ക്കു ഏറെ ബുദ്ധിമുട്ട് ഉണ്ടാക്കുന്നുണ്ടെന്നും ഇവര്‍ക്കായി 250 രൂപയുടെയും 100 രൂപയുടെയും ഫീസ് നിരക്ക് കൊണ്ടു വരണമെന്നും കൗണ്‍സില്‍ യോഗം പ്രമേയത്തിലൂടെ ആവശ്യപ്പെട്ടു. ചെയര്‍പേഴ്‌സണ്‍ സോണിയഗിരി പ്രമേയം അവതരിപ്പിച്ചു. മുനിസിപ്പല്‍ ചെയര്‍പേഴ്‌സണ്‍ സോണിയഗിരി അധ്യക്ഷത വഹിച്ച യോഗത്തില്‍ അഡ്വ. കെ.ആര്‍. വിജയ, സി.സി. ഷിബിന്‍, അംബിക പള്ളിപ്പുറത്ത്, അഡ്വ. ജിഷ ജോബി, സന്തോഷ് ബോബന്‍, ടി.കെ. ഷാജു എന്നിവര്‍ പ്രസംഗിച്ചു.
About Author
വാര്‍ഡ് വിഭജനം; കരട് വിജ്ഞാപനമായി; ഇരിങ്ങാലക്കുട നഗരസഭയില്‍ ഇനി 43 വാര്‍ഡുകള്‍ 
നഗരസഭയുടെ ഭരണപരാജയം; ആം ആദ്മി പാര്‍ട്ടി പന്തംകൊളുത്തി പ്രകടനം നടത്തി 
നഗരസഭയുടെ ആധുനിക അറവുശാല പദ്ധതി; കിഫ്ബി/അമൃത് എജന്‍സിയില്‍ നിന്നും ഗ്രാന്റ് ലഭിക്കില്ല 
മുനമ്പം ജനതക്ക് പുല്ലൂര്‍ ഇടവകയുടെ ഐക്യദാര്‍ഢ്യം 
ജെസിഐ ക്രിക്കറ്റ് ടൂര്‍ണമെന്റ്; ഡൈനാമിക് ഡെയര്‍ ഡേവിള്‍സ് ജേതാക്കള്‍ 
ചേലക്കടവ് പ്രദേശത്തെ വീടുകള്‍ പൊളിച്ചുനീക്കാന്‍ വൈകുന്നതില്‍ ചേലക്കടവ് നിവാസികളുടെ പ്രതിഷേധം