കൂടല്‍മാണിക്യം ഉത്സവംഭക്തിയുടെ നിറവില്‍ പള്ളിവേട്ട; ആറാട്ട് ഇന്ന്
ഇരിങ്ങാലക്കുട: കൂടല്‍മാണിക്യം ക്ഷേത്രോത്സവത്തിന്റെ ഭാഗമായി ഇന്നലെ രാത്രി നടന്ന പള്ളിവേട്ട ഭക്തിസാന്ദ്രമായി. നൂറുകണക്കിന് ഭക്തജനങ്ങളാണ് ചടങ്ങില്‍ പങ്കെടുക്കാനെത്തിയിരുന്നത്. രാത്രി എട്ടരയോടെയായിരുന്നു ഭഗവാന്റെ പള്ളിവേട്ട. എഴുന്നള്ളിപ്പിന് മുന്നോടിയായി നെറ്റിപ്പട്ടം ഇല്ലാത്ത ഗജവീരനെ മുന്നിലയച്ചു. തുടര്‍ന്ന് ആനപ്പുറത്ത് എഴുന്നള്ളിയ ഭഗവാന്‍ കിഴക്കേ ഗോപുരകവാടം കടന്നതോടെ ആചാരത്തിന്റെ ഭാഗമായി പോലീസ് സേന റോയല്‍ സല്യൂട്ട് നല്‍കി. ചമയങ്ങളോ ചങ്ങലകളോ ഇല്ലാതെ മൂന്ന് ആനകളുടെ അകമ്പടിയോടെയാണ് ഭഗവാന്‍ ആല്‍ത്തറയ്ക്കല്‍ എഴുന്നള്ളിയത്. ആല്‍ത്തറയിലെത്തി ബലിതൂകിയശേഷം ഒരുക്കിവെച്ചിരുന്ന പന്നിക്കോലത്തില്‍ പാരമ്പര്യ അവകാശികളായ മുളയത്ത് വീട്ടിലെ ഇപ്പോഴത്തെ കാരണവര്‍ നാരായണന്‍കുട്ടിനായരുടെ മകന്‍ സത്യന്‍ മുളയത്ത് അമ്പെയ്തു. മുളയത്ത് കുടുംബാംഗം വൈശാഖ് സഹായിയായി. അമ്പെയ്തശേഷം കൊറ്റയില്‍ തറവാട്ടിലെ പ്രതിനിധി രാമചന്ദ്രന്‍ പന്നിയുടെ രൂപം തലയില്‍ വച്ച് ക്ഷേത്രത്തിലേക്ക് ആനയിച്ചു. പള്ളിവേട്ടയ്ക്കുശേഷം അഞ്ച് ആനകളെ അണിനിരത്തി പഞ്ചവാദ്യ അകമ്പടിയില്‍ ഭഗവാന്‍ തിരിച്ചെഴുന്നള്ളി. പാറമേക്കാവ് കാശിനാഥന്‍ തിടമ്പേറ്റി. പഞ്ചവാദ്യത്തിന് പെരുവനം കൃഷ്ണകുമാര്‍ പ്രമാണം വഹിച്ചു. കുട്ടംകുളത്തിന് സമീപം മദ്ദളം അവസാനിച്ചശേഷം ചെമ്പട വഹകൊട്ടി ആരംഭിച്ച പാണ്ടിമേളത്തിന് മൂര്‍ക്കനാട് ദിനേശന്‍ വാരിയര്‍ നേതൃത്വം നല്‍കി. ക്ഷേത്രനടയ്ക്കല്‍ മേളം അവസാനിച്ച് തൃപുടകൊട്ടി ഭഗവാന്‍ അകത്തേയ്ക്ക് പ്രവേശിച്ച് മറ്റു ചടങ്ങുകള്‍ പൂര്‍ത്തിയാക്കി. ഉത്സവത്തിന് സമാപനംകുറിച്ചുകൊണ്ടുള്ള ആറാട്ടിനായി ഭഗവാന്‍ ഇന്ന് രാവിലെ എഴുന്നള്ളും. എട്ടോടെ മൂന്നാനകളുടെ അകമ്പടിയോടെയാണ് ഭഗവാന്റെ എഴുന്നള്ളിപ്പ്. ഉച്ചയ്ക്ക് ഒന്നിന് രാപ്പാള്‍ ആറാട്ടുകടവിലാണ് പള്ളിനീരാട്ട്. വൈകീട്ട് അഞ്ചിന് തിരിച്ചെഴുന്നള്ളിപ്പ് നടക്കും. രാത്രി 8.30ന് ആറാട്ട് എഴുന്നള്ളിപ്പ് ആല്‍ത്തറയിലെത്തും. തുടര്‍ന്ന് പഞ്ചാവാദ്യത്തിന് അയലൂര്‍ അനന്ത നാരായണ ശര്‍മ പ്രമാണം വഹിക്കും. പാണ്ടിമേളത്തിന് രാജീവ് വാരിയര്‍ പ്രമാണം വഹിക്കും. തുടര്‍ന്ന് ഭഗവാനെ അകത്തേയ്ക്ക് എഴുന്നള്ളിക്കുന്നതോടെ ഈ വര്‍ഷത്തെ തിരുവുത്സവത്തിന് സമാപനം കുറിക്കും.
About Author
കൂടല്‍മാണിക്യം ഉത്സവത്തിന്റെ ശ്രീരാമ പട്ടാഭിഷേകം ഭക്തര്‍ക്ക് ആസ്വാദനത്തിന്റെ മായികലോകം സൃഷ്ടിച്ചു 
പഞ്ചാരി പെയ്തിറങ്ങിയ കൂടല്‍മാണിക്യം, അവസാന ശീവേലിക്ക് ആയിരങ്ങള്‍ സാക്ഷിയായി 
കത്തിച്ചു വെച്ച ഒരു നിലവിളക്കു മാത്രം, പുരാണ കഥകളെ അടിസ്ഥാനമാക്കി രചിച്ച ശ്ലോകങ്ങള്‍ ചൊല്ലി പടിഞ്ഞാറേ പ്രദക്ഷിണവഴിയില്‍ പാഠകം 
ചരിത്ര സ്മരണയുറങ്ങുന്ന വിസ്മയ മന്ദിരങ്ങള്‍, വലിയതമ്പുരാന്‍ കോവിലകം ശക്തന്റെ ഉത്സവാസ്വാദന മന്ദിരം 
കൂടല്‍മാണിക്യം; വലിയവിളക്കിന് ലക്ഷദീപങ്ങള്‍ തെളിഞ്ഞു, ഇന്ന് പള്ളിവേട്ട 
ഇരിങ്ങാലക്കുട ഡോണ്‍ബോസ്‌കോ ദൈവാലയത്തിലെ സഹായ മാതാവിന്റെ തിരുനാള്‍ കൊടിയേറി 
