കൂടല്‍മാണിക്യം; വലിയവിളക്കിന് ലക്ഷദീപങ്ങള്‍ തെളിഞ്ഞു, ഇന്ന് പള്ളിവേട്ട
ഇരിങ്ങാലക്കുട കൂടല്‍മാണിക്യം ക്ഷേത്രോത്സവത്തോടനുബന്ധിച്ച് വലിയ വിളക്ക് ദിവസമായ ഇന്നലെ ക്ഷേത്രത്തില്‍ ലക്ഷദീപങ്ങള്‍ തെളിഞ്ഞപ്പോള്‍.
ഇരിങ്ങാലക്കുട: കൂടല്‍മാണിക്യം ക്ഷേത്രത്തില്‍ ഇന്ന് വൈകീട്ട് പള്ളിവേട്ട. ക്ഷേത്രോത്സവം സമാപനത്തിലേക്കു നീങ്ങുമ്പോള്‍ ക്ഷേത്രമതില്‍ക്കെട്ടിനകത്തെ നാദതാളലയങ്ങളാല്‍ മുഖരിതമായ അന്തരീക്ഷം പട്ടണത്തിനും കൈവരുന്നു. ഇന്നാണ് ദേവന്‍ ആദ്യമായി ക്ഷേത്രത്തിനു പുറത്തേക്കെഴുന്നള്ളുന്നത്. ഉത്സവത്തിലെ അവസാന ശീവേലി എഴുന്നള്ളിപ്പ് കിഴക്കേ നടയില്‍ ആരംഭിക്കും. 17 ഗജവീരന്‍മാരുടെ അകമ്പടിയോടെ ഭഗവാന്റെ എഴുന്നള്ളിപ്പ് പത്മശ്രീ പെരുവനം കുട്ടന്‍മാരാരുടെ മേളപ്രമാണത്തില്‍ ആരംഭിക്കും. സാധാരണ ദിവസങ്ങളില്‍ നടക്കാറുള്ള മുളപൂജ പള്ളിവേട്ട ദിവസമായ ഇന്നുണ്ടാവില്ല. പതിവുപോലെ ശീവേലി കഴിഞ്ഞ് ഉച്ചയ്ക്ക് 12.30ന് അകത്തു കയറുന്ന ദേവന്‍ രാത്രി എട്ടരയോടെ പള്ളിവേട്ടക്കെഴുന്നള്ളുകയാണ്.
അത്താഴപൂജയ്ക്ക് ആവാഹിച്ചെഴുന്നള്ളിച്ച് ശ്രീഭൂതബലി തൂവിക്കഴിഞ്ഞാല്‍ കൊടിമരച്ചുവട്ടില്‍വച്ച് ദേവന്റെ അനുവാദം വാങ്ങി പള്ളിവേട്ടയ്ക്ക് പാണികൊട്ടുന്നു. ദേവന്‍ തന്റെ അനുചരന്മാരെയുംകൊണ്ട് ഹിംസ്രജന്തുക്കളെ നാമാവശേഷമാക്കാന്‍ പുറപ്പെടുന്നതിന്റെ പ്രതീകമാണിത്. പാണി കഴിഞ്ഞാല്‍ ഗോപുരദ്വാരത്തിലും ആല്‍ത്തറയിലും ബലിതൂകി പള്ളിവേട്ട ആല്‍ത്തറയിലേക്ക് ദേവന്‍ എഴുന്നള്ളും. നെറ്റിപ്പട്ടം അണിയാത്ത ഒരാന മുമ്പിലും തന്ത്രിയും പരികര്‍മിയും പരിവാരങ്ങളും തുടര്‍ന്ന് തിടമ്പേറ്റിയ ഗജവീരനും അകമ്പടി സേവിക്കുന്ന ഉള്ളാനകളടക്കമുള്ള നാലു ഗജവീരന്‍മാരും എന്ന ക്രമത്തിലായിരിക്കും പള്ളിവേട്ട ആല്‍ത്തറയിലേക്കുള്ള യാത്ര.
ഉത്സവകാലത്ത് ക്ഷേത്ര മതില്‍കെട്ടിന് പുറത്തേക്ക് എഴുന്നള്ളുന്ന ഭഗവാന് കേരള പോലീസ് കിഴക്കേനടയില്‍ ഗാര്‍ഡ് ഓഫ് ഓണര്‍ നല്‍കും. പള്ളിവേട്ടയ്ക്ക് എഴുന്നള്ളുന്നത് പൂര്‍ണ നിശബ്ദതയിലാണ്. ശബ്ദമുണ്ടാകാതിരിക്കുവാനായി ആനയുടെ കഴുത്തിലെ മണികളോ, ചങ്ങലയോ അണിയിക്കാറില്ല. എഴുന്നള്ളിപ്പ് ആല്‍ത്തറയ്ക്കല്‍ എത്തിച്ചേരുമ്പോള്‍ ഒരു പന്നിയുടെ കോലം കെട്ടിയുണ്ടാക്കി ദേവന്‍ അമ്പെയ്ത് കൊല്ലുകയാണ്. ഇതാണ് പള്ളിവേട്ട. ഇതോടനുബന്ധിച്ച് എട്ടു ദിക്കിലേക്കും ബലിതൂകലുമുണ്ട്. തിന്മയെ ഉന്മൂലനം ചെയ്ത് നന്മയെ സ്ഥാപിക്കുകയെന്നതാണു ഈ പള്ളിവേട്ടയുടെ ലക്ഷ്യം.
പള്ളിവേട്ട കഴിഞ്ഞ് ഗംഭീര പഞ്ചവാദ്യത്തിന്റെ അകമ്പടിയോടെയാണ് ദേവന്‍ തിരിച്ചെഴുന്നള്ളുന്നത്. പെരുവനം കൃഷ്ണകുമാറിന്റെ നേതൃത്വത്തിലാണു പഞ്ചവാദ്യം നടക്കുക. എഴുന്നള്ളിപ്പ ുട്ടംകുളം പരിസരത്തെത്തിയാല്‍ പഞ്ചവാദ്യം അവസാനിച്ച് പാണ്ടിമേളം ആരംഭിച്ച് ക്ഷേത്രത്തിന്റെ കിഴക്കേ നടയിലെത്തി ക്ഷേത്രത്തിനുള്ളില്‍ ഒരു പ്രദക്ഷിണം പൂര്‍ത്തിയാക്കും. തുടര്‍ന്നാണ് പള്ളിക്കുറുപ്പ്. പാണ്ടിമോളത്തിന് മൂര്‍ക്കനാട് ദിനേശന്‍ വാര്യര്‍ പ്രമാണം വഹിക്കും ഇന്നലെ നടന്ന വലിയവിളക്കാഘോഷത്തിന് ക്ഷേത്രത്തിലെ എല്ലാ വിളക്കുകളിലും ജ്വാല തെളിഞ്ഞു.
ഒമ്പതാം ഉത്സവം
കൂടല്‍മാണിക്യത്തില്‍ ഇന്ന്
(സ്‌പെഷ്യല്‍ പന്തലില്‍)
ഉച്ചതിരിഞ്ഞ് ഒരുമണി മുതല്‍ അഞ്ച് വരെ തിരുവാതിരക്കളി, അഞ്ച് മുതല്‍ 5.15 വരെ മണലൂര്‍ അവനി സഞ്ജയ് യുടെ ഓട്ടന്‍തുള്ളല്‍, 5.20 മുതല്‍ 6.15 വരെ ചാലക്കുടി നാദബ്രഹ്മത്തിന്റെ ഭക്തിഗാനമേള, 6.20 മുതല്‍ 6.45 വരെ എസ്എന്‍ പുരം മീനാക്ഷി എസ്. നായരുടെ ഭരതനാട്യം, 6.50 മുതല്‍ 7.30 വരെ മുളങ്കുന്നത്തുകാവ് സന്‍സ്‌കൃതി കലാക്ഷേത്രയുടെ നൃത്തനൃത്യങ്ങള്‍, 7.35 മുതല്‍ 8.15 വരെ പുല്ലൂര്‍ നടരാജ നാട്യകലാക്ഷേത്രത്തിന്റെ ശാസ്ത്രീയനൃത്തം, 8.20 മുതല്‍ 8.50 വരെ തിരുവനന്തപരം വര്‍ഷ വാസുദേവിന്റെ കേരളനടം.
(സംഗമം വേദിയില്‍)
രാവിലെ 8.30മുതല്‍ ശീവേലിക്ക് പത്മശ്രീ പെരുവനം കുട്ടന്‍മാരാര്‍ പ്രമാണം വഹിക്കും. ഉച്ചതിരിഞ്ഞ് ഒരുമണി മുതല്‍ 2.35 വരെ തിരുവാതിരക്കളി, 2.35 മുതല്‍ 3.30 വരെ ഇരിങ്ങാലക്കുട സംഗമേശ്വര നൃത്തവിദ്യാലയം നന്ദന സജീവും സംഘവും അവതരിപ്പിക്കുന്ന നൃത്തനൃത്യങ്ങള്‍, 3.35 മുതല്‍ 4.20 വരെ ഇരിങ്ങാലക്കുട ഗാന്ധിഗ്രാം ഷീബ സത്യന്റെ കീര്‍ത്തനം, 4.25 മുതല്‍ 5.20 വരെ തിരൂര്‍ ശ്രീദിവ്യ ശ്രീനാഥും സംഘവും അവതരിപ്പിക്കുന്ന ഭരതനാട്യകച്ചേരി, 5.25 മുതല്‍ 6.20 വരെ എടക്കുളം സുരേഷ് ലാസ്യയുടെ കുച്ചിപ്പുടി, 6.25 മുതല്‍ 7.25 വരെ ചെന്നൈ കലൈമാമണി ഡോ. സംഗീത കബിലന്റെ ഭരതനാട്യം, 7.30 മുതല്‍ 8.30 വരെ കലാമണ്ഡലം വൈഷ്ണവി, കലാമണ്ഡലം രഞ്ജിനി, കലാമണ്ഡലം രേഷ്മ രാജഗോപാല്‍ എന്നിവരുടെ നൃത്തസമന്വയം തുടര്‍ന്ന് പള്ളിവേട്ട. പള്ളിവേട്ട ചടങ്ങുകള്‍ക്ക് മുരിയാട് മുളയത്ത് നാരായണന്‍കുട്ടി നായര്‍ നേതൃത്വം നല്‍കും. പഞ്ചവാദ്യത്തിന് പെരുവനം കൃഷ്ണകുമാര്‍ മുതല്‍ പേരും പാണ്ടിമേളത്തിന് ഡോ. മൂര്‍ക്കനാട് ദിനേശന്‍ വാര്യരും പ്രമാണം വഹിക്കും.
About Author
തുറവന്‍കുന്ന് ഇടവക വാര്‍ഷികം നടത്തി 
യൂത്ത് കോണ്‍ഗ്രസ് ഇരിങ്ങാലക്കുട ടൗണ്‍ മണ്ഡലം കമ്മിറ്റി സംഭാര വിതരണം നടത്തി 
കത്തിച്ചു വെച്ച ഒരു നിലവിളക്കു മാത്രം, പുരാണ കഥകളെ അടിസ്ഥാനമാക്കി രചിച്ച ശ്ലോകങ്ങള്‍ ചൊല്ലി പടിഞ്ഞാറേ പ്രദക്ഷിണവഴിയില്‍ പാഠകം 
ചരിത്ര സ്മരണയുറങ്ങുന്ന വിസ്മയ മന്ദിരങ്ങള്‍, വലിയതമ്പുരാന്‍ കോവിലകം ശക്തന്റെ ഉത്സവാസ്വാദന മന്ദിരം 
ഇരിങ്ങാലക്കുട ഡോണ്‍ബോസ്‌കോ ദൈവാലയത്തിലെ സഹായ മാതാവിന്റെ തിരുനാള്‍ കൊടിയേറി 
ഡോ. ശാലിനി അവതരിപ്പിച്ച മോഹിനിയാട്ടം ആസ്വാദകരുടെ മനം കവര്‍ന്നു 
