കാട്ടൂര്‍ സര്‍വ്വീസ് സഹകരണ ബാങ്ക് ഇഎസ്‌ഐ ആനുകൂല്യം ഏര്‍പ്പെടുത്തി

കാട്ടൂര്‍: കാട്ടൂര്‍ സര്‍വ്വീസ് സഹകരണബാങ്കിന് കീഴില്‍ പ്രവര്‍ത്തിച്ചുവരുന്ന 28 സ്ഥാപനങ്ങളിലെ ജീവനക്കാര്‍ക്ക് ഇഎസ്‌ഐ ആനുകൂല്യം ഏര്‍പ്പെടുത്തി. ഇഎസ്‌ഐ കാര്‍ഡിന്റെ വിതരണോദ്ഘാടനം നാട്ടിക പഞ്ചായത്ത് മുന്‍ പ്രസിഡന്റും നാട്ടിക സോഷ്യല്‍ വെല്‍ഫയര്‍ സഹകരണസംഘം പ്രസിഡന്റുമായ അനില്‍ പുളിക്കല്‍ നിര്‍വഹിച്ചു. ബാങ്ക് സ്ഥാപനങ്ങളില്‍ ജോലി ചെയ്തുവരുന്നതും 21,000 രൂപയ്ക്ക് താഴെ ശമ്പളം പറ്റുന്നതുമായ ജീവനക്കാര്‍ക്കാണ് ബാങ്കിപ്പോള്‍ ഇഎസ്‌ഐ ആനുകൂല്യം ഏര്‍പ്പെടുത്തിയിരിക്കുന്നതെന്നും ഈ ആവശ്യത്തിന് പ്രതിവര്‍ഷം 2.5 ലക്ഷത്തോളം രൂപ ബാങ്കിന് അധികചെലവ് വരുമെന്നും പ്രതിമാസ ശമ്പളത്തിന്റെ 3.25 ശതമാനം ബാങ്കും 0.75 ശതമാനം വിഹിതം ജീവനക്കാരുമാണ് അടക്കേണ്ടതെന്നും ബാങ്ക് പ്രസിഡന്റ് ജോമോന്‍ വലിയവീട്ടില്‍ പറഞ്ഞു. ചീഫ് ലേബര്‍ കണ്‍സള്‍ട്ടന്റ് സി.എസ്. സൂരജ് ക്ലാസ് നയിച്ചു. ഭരണസമിതി അംഗങ്ങളായ പി.പി. ആന്റണി, കെ.ബി. ബൈജു, ഡയറക്ടര്‍ എം.ജെ. റാഫി, സെക്രട്ടറി ടി.വി. വിജയകുമാര്‍ എന്നിവര്‍ സംസാരിച്ചു.