റഷീദ് കാറളത്തിന്റെ ‘സൈഡ് കര്‍ട്ടന്‍’ എന്ന കഥാസമാഹാരം പ്രകാശനം ചെയ്തു

ഇരിങ്ങാലക്കുട: സാഹിത്യ സാംസ്‌കാരിക രംഗത്തും ശാസ്ത്ര പ്രചാരണ രംഗത്തും രാഷ്ട്രീയ സാമൂഹിക രംഗത്തും സജീവ പ്രവര്‍ത്തകനായ റഷീദ് കാറളത്തിന്റെ ‘സൈഡ് കര്‍ട്ടന്‍’ എന്ന കഥാസമാഹാരം ഇരിങ്ങാലക്കുട പിഡബ്ല്യുഡി റസ്റ്റ് ഹൗസില്‍ ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദു കഥാകൃത്തും കവിയത്രിയുമായ വി.വി. ശ്രീലക്ക് നല്കികൊണ്ട് പ്രകാശനം ചെയ്തു. ജീവിതാനുഭവങ്ങളും സാമൂഹ്യ പ്രതിബദ്ധതയും പ്രതിപാദിക്കുന്ന ജീവനുറ്റ കഥകളാണ് റഷീദ് കാറത്തിന്റേതെന്നും ആദ്യ കഥാസമാഹാരം വിറ്റുകിട്ടിയ തുക മുഖ്യമന്ത്രിയുടെ ദുരിതാശ്വാസ നിധിയിലേക്കു സംഭാവന നല്‍കിയതു മാതൃകാപരമായ പ്രവര്‍ത്തിയാണെന്നും മന്ത്രി പറഞ്ഞു. കര്‍ഷകരുടേയും പ്രവാസികളുടേയും കഥകള്‍ കൂട്ടി വായിക്കുമ്പോള്‍ നാനാതുറകളിലും അധ്വാനിക്കുന്ന മനുഷ്യ സ്‌നേഹത്തിന്റെ ആര്‍ദ്രതയൂറുന്നതായും പ്രണയത്തിന്റെ ഉദാത്തമായ ഒരു തലം കഥകളില്‍ കാണാനാവുന്നുവെന്നും പുസ്തകം സ്വീകരിച്ചുകൊണ്ട് വി.വി. ശ്രീല അഭിപ്രായപ്പെട്ടു. കേരള ശാസ്ത്രസാഹിത്യ പരിഷത്ത് ഇരിങ്ങാലക്കുട മേഖലാ പ്രസിഡന്റ് ദീപ ആന്റണി അധ്യക്ഷത വഹിച്ചു. പി.എന്‍. സുനില്‍, എ.ടി. നിരൂപ്, റഷീദ് കാറളം എന്നിവര്‍ പ്രസംഗിച്ചു.

About Author

ijknews

See author's posts