വൻ കൃഷിനാശം; താഴ്ന്ന പ്രദേശങ്ങളില്‍ പലയിടത്തും വെള്ളം കയറി
ഇരിങ്ങാലക്കുട: ഇരിങ്ങാലക്കുട മേഖലയിലെ താഴ്ന്ന പ്രദേശങ്ങളില്‍ പലയിടത്തും വെള്ളം കയറി. പടിയൂര്‍ പഞ്ചായത്തില്‍ പോത്താനി കിഴക്കേപാടത്ത് 42 ഏക്കറില്‍ നട്ടിരുന്ന ഞാറ് മുഴുവന്‍ വെള്ളത്തിലായി. കഴിഞ്ഞ മാസം പെയ്ത മഴയില്‍ വെള്ളംകയറി നശിച്ച ഞാറ് മാറ്റി 15 ദിവസം മുമ്പാണു വീണ്ടും ഞാറുനട്ടതെന്നു കര്‍ഷകര്‍ പറഞ്ഞു. ഷട്ടര്‍ തുറക്കാത്തതിനാല്‍ കരുവന്നൂര്‍ പുഴയില്‍ വലിയതോതില്‍ വെള്ളം ഉയര്‍ന്നിട്ടില്ലെന്നു സമീപവാസികള്‍ പറഞ്ഞു. കഴിഞ്ഞ ദിവസം മഴയ്ക്കു നേരിയ ശമനമുണ്ടായതിനാല്‍ പലയിടത്തും വെള്ളം താഴ്ന്നുതുടങ്ങി. പുല്ലൂര്‍ മഠത്തിക്കരയില്‍ മതിലിടിഞ്ഞു കാനയിലേക്കു വീണു. മഠത്തിക്കര രാജേഷിന്റെ വീടിന്റെ മതിലാണ് ഇടിഞ്ഞു സമീപത്തെ കാനയിലേക്കു വീണത്. ഇതേത്തുടര്‍ന്ന് ശാസ്താംകുളത്തില്‍ നിന്നും അവിട്ടത്തൂര്‍ പൊതുമ്പച്ചിറയിലേക്കു വെള്ളമൊഴുകുന്ന കാന അടഞ്ഞു സമീപ വീടുകളിലേക്കു വെള്ളംകയറി. പിന്നീട് പ്രദേശവാസികളുടെ നേതൃത്വത്തില്‍ മതിലിന്റെ അവശിഷ്ടങ്ങള്‍ കാനയില്‍ നിന്നും മാറ്റിയാണു നീരൊഴുക്ക് പുനസ്ഥാപിച്ചത്. വീട് ഉയരത്തിലായതിനാല്‍ മതിലിനൊപ്പം വീടിനോടു ചേര്‍ന്നുള്ള മണ്ണും വീണു. ഇതേത്തുടര്‍ന്നു വീടും കിണറും തകര്‍ച്ചാഭീഷണിയിലാണ്. മുരിയാട് ഗ്രാമപഞ്ചായത്ത് പ്രസിഡന്റ് ജോസ് ജെ. ചിറ്റിലപ്പിള്ളി, വാര്‍ഡ് മെമ്പര്‍ മനീഷ മനീഷ്, ഇരിങ്ങാലക്കുട നഗരസഭാ കൗണ്‍സിലര്‍ സന്തോഷ് ബോബന്‍, മുന്‍ നഗരസഭ ചെയര്‍പേഴ്‌സണ്‍ നിമ്യ ഷിജു എന്നിവര്‍ സ്ഥലം സന്ദര്‍ശിച്ചു. മഴ കനത്തതോടെ വെള്ളാങ്കല്ലൂര്‍ മേഖലയിലെ പാടശേഖരങ്ങള്‍ വെള്ളക്കെട്ടിലായി. തോടുകള്‍ പലയിടത്തും കവിഞ്ഞൊഴുകുന്ന നിലയിലാണ്. ആനയ്ക്കല്‍ച്ചിറ തോട് പൊട്ടി ആനയ്ക്കല്‍ പാടശേഖരത്തിലെ നാലേക്കര്‍ നെല്‍കൃഷി വെള്ളത്തിലായി. പാടശേഖരത്തിലെ ഒരുഭാഗം മുഴുവന്‍ തോട്ടിലൂടെ കുത്തിയൊലിച്ചുവന്ന കല്ലും മണ്ണും നിറഞ്ഞ നിലയിലാണ്. പൈങ്ങോട് കല്ലേരിപ്പാടം റോഡിലും വെള്ളം കയറി.
About Author
ഫോട്ടോഗ്രാഫിയുടെ ഋതുഭേദങ്ങള്‍ അടയാളപ്പെടുത്തിയ പുസ്തകശേഖരം സെന്റ് ജോസഫ്‌സ് കോളജിന് കൈമാറി എ.സി. ജയന്‍ 
ആര്‍പ്പുവിളികളോടെ ചേറില്‍ ചവിട്ടി, വിത്തെറിഞ്ഞ്… 
അമര്‍ജവാന്‍ യുദ്ധസ്മാരകത്തിന് സ്റ്റോപ്പ് മെമ്മോ 
യുവജന കൂട്ടായ്മയുടെ മാതൃകാപരമായ പ്രവര്‍ത്തനം; പൂവത്തുംകടവില്‍ ആധുനിക സൗകര്യങ്ങളോടെ വേറിട്ട ബസ് സ്റ്റോപ്പ് 
പ്ലാസ്റ്റിക് മാലിന്യങ്ങള്‍ കുറയ്ക്കുന്നതിനും പരിസ്ഥിതി സംരക്ഷണത്തിനുമായി സ്വയം നിര്‍മിച്ച പേപ്പര്‍ ക്യാരിബാഗുകള്‍ വിതരണം ചെയ്തു 
ഇരിങ്ങാലക്കുട ജനമൈത്രി പൊലിസ് ഓപ്പറേഷന്‍ തൂഫാന്‍ ഫുട്‌ബോള്‍ ടൂര്‍ണമെന്റ്; ക്രൈസ്റ്റ് കോളജ് ജേതാക്കള്‍ 
