മഴ: കൊയ്യാറായ പാടം വെള്ളത്തില്‍ മുങ്ങി
ഇരിങ്ങാലക്കുട: വെള്ളാങ്കല്ലൂര്‍ പഞ്ചായത്തിലെ കണ്ണോളിച്ചിറ, ആനയ്ക്കല്‍ ചിറ പാടശേഖരങ്ങളിലെ ആറേക്കര്‍ നാടന്‍ നെല്‍കൃഷിയും എടതിരിഞ്ഞി പോത്താനി കിഴക്കെ പാടശേഖരത്തിലുമായി കൊയ്യാറായ നെല്ല് വെള്ളത്തിലായി. കഴിഞ്ഞ ദിവസം രാത്രി പെയ്ത കനത്ത മഴയിലാണു നെല്ല് വെള്ളത്തില്‍ മുങ്ങിയത്. കണ്ണോളിച്ചിറ, ആനയ്ക്കല്‍ ചിറ പാടശേഖരങ്ങളിലെ ഭൂരിഭാഗവും ഈ മാസം പകുതിയോടെ കൊയ്യാന്‍ നിശ്ചയിച്ചിരുന്നതാണ്. നാടന്‍ നെല്ലിനങ്ങളായ കുറുവ, തവളക്കണ്ണന്‍ എന്നിവയ്ക്കാണു നാശം ഉണ്ടായത്. നെല്‍ച്ചെടി പൂര്‍ണമായും ഒടിഞ്ഞു വീണു. വെള്ളം കയറിയതിനാല്‍ കൊയ്ത്തുയന്ത്രം ഇറക്കാന്‍ കഴിയാത്ത സ്ഥിതിയാണ്. ദീര്‍ഘകാലമായി തരിശുകിടന്നിരുന്ന സ്ഥലങ്ങളില്‍ ഉള്‍പ്പെടെ കഴിഞ്ഞ ഏതാനും വര്‍ഷങ്ങളായി നാടന്‍ നെല്ലിനങ്ങള്‍ ജൈവരീതിയിലാണു കൃഷി ചെയ്തു വരുന്നത്. മഴയെ ആശ്രയിച്ച് കൃഷി നടക്കുന്ന പാടശേഖരങ്ങളില്‍ ഇത്തവണ ആവശ്യത്തിനു മഴ ലഭിച്ചതിന്റെ ആശ്വാസത്തിലായിരുന്നു കര്‍ഷകര്‍. നന്നായി വിളഞ്ഞു കൊയ്യാന്‍ പാകമായി നില്‍ക്കുമ്പോഴാണു അപ്രതീക്ഷിതമായ മഴ കര്‍ഷകര്‍ക്കു ഇരുട്ടടിയായത്. ചില കര്‍ഷകര്‍ വൈക്കോല്‍ ലഭിക്കാനായി തൊഴിലാളികളെ വെച്ച് കൊയ്‌തെടുത്തു. വെള്ളത്തില്‍ വീണവ കൊയ്‌തെടുക്കാന്‍ സമയവും അധ്വാനവും കൂടുതല്‍ വേണം എന്നതും കൃഷിക്കാരെ ബുദ്ധിമുട്ടിലാക്കുന്നു. കൊയ്യാനുള്ള തൊഴിലാളികളുടെ ക്ഷാമവും നിലനില്‍ക്കുന്നുണ്ട്. പോത്താനി കിഴക്കെ പാടത്ത് കൊയ്യാന്‍ പാകമായ 20 ഹെക്ടര്‍ നെല്‍കൃഷിയാണ് വെള്ളത്തിലായത്. കൊയ്ത്തു കഴിഞ്ഞ വൈക്കോലും വെള്ളത്തിലായി.
About Author
ഞാറ്ററിവിന്റെ പാഠങ്ങള്‍തേടി ഗവ. ഗേള്‍സ് ഹയര്‍ സെക്കന്‍ഡറി സ്‌ക്കൂളിലെ എന്‍എസ്എസ് വിദ്യാര്‍ഥികള്‍ 
കാറളം ഹരിപുരം അമ്പലക്കടവില്‍ ഒരു ലക്ഷം കാര്‍പ്പ് മത്സ്യകുഞ്ഞുങ്ങളെ നിക്ഷേപിച്ചു 
ജൈവ മഞ്ഞള്‍ കൃഷി രീതിയും വിപണനവും പഠിക്കാന്‍ കൃഷിയിടം സന്ദര്‍ശിച്ചു 
കരൂപ്പടന്ന സ്‌കൂളിലെ എന്‍എസ്എസ് വിദ്യാര്‍ഥികള്‍ മനയ്ക്കലപ്പടി ആനയ്ക്കല്‍ച്ചിറ പാടത്ത് ഞാറുനട്ടു 
എല്ലാ പശുക്കള്‍ക്കും ഇന്‍ഷ്വറന്‍സ് പദ്ധതി കേരളം നടപ്പാക്കും: മന്ത്രി ചിഞ്ചുറാണി 
കരുവന്നൂര്‍ ബാങ്ക് വളം ഡിപ്പോ തുറക്കല്‍: റിപ്പോര്‍ട്ട് ആവശ്യപ്പെട്ട് സഹകരണ രജിസ്ട്രാര്‍ 
