കൂടല്‍മാണിക്യം ഉത്സവം: വകുപ്പ് മേധാവികളുടെ യോഗം ചേര്‍ന്നു
ഇരിങ്ങാലക്കുട: കൂടല്‍മാണിക്യം ഉത്സവം ഭംഗിയായി നടത്തുന്നതിനു വേണ്ടി ഉന്നത വിദ്യാഭ്യാസ മന്ത്രി ഡോ. ആര്‍. ബിന്ദുവിന്റെ നേതൃത്വത്തില്‍ വകുപ്പ് മേധാവികളുടെ യോഗം ചേര്‍ന്നു. ഇരിങ്ങാലക്കുട ആര്‍ഡിഒ ഹരീഷ് അധ്യക്ഷത വഹിച്ചു. മുനിസിപ്പല്‍ ചെയര്‍പേഴ്‌സണ്‍ സോണിയഗിരി, ദേവസ്വം അഡ്മിനിസ്‌ട്രേറ്റര്‍ എം. സുഗിത, ചെയര്‍മാന്‍ യു. പ്രദീപ്‌മേനോന്‍, പോലീസ്, വനം, വെറ്ററിനറി, അഗ്നിരക്ഷാസേന, വാട്ടര്‍ അഥോറിറ്റി, പൊതുമരാമത്ത്, ആരോഗ്യം, മുനിസിപ്പാലിറ്റി, കെഎസ്ഇബി തുടങ്ങി വിവിധ വകുപ്പുകളെ പ്രതിനിധാനം ചെയ്ത് മേധാവികള്‍ പങ്കെടുത്തു.
കൂടല്‍മാണിക്യം ക്ഷേത്രോത്സവത്തിന് നാളെ കൊടിയേറും, 22 ന് കൂടപ്പുഴ ആറാട്ട് കടവില്‍ ആറാട്ട്
ഇരിങ്ങാലക്കുട: കൂടല്‍മാണിക്യം ക്ഷേത്രോത്സവത്തിനു നാളെ കൊടിയേറി 22 നു കൂടപ്പുഴ ആറാട്ട് കടവില്‍ ആറാട്ടോടെ സമാപിക്കും. ഏഴു ദിവസം നീണ്ടു നില്‍ക്കുന്ന കഥകളിയും ചുറ്റമ്പലത്തിനുള്ളിലെ താന്ത്രിക ചടങ്ങുകളും ക്ഷേത്രസംസ്‌കാരത്തിനും ചേരുന്ന കലാപരിപാടികളും 17 ആനകള്‍ അണിനിരക്കുന്ന ശീവേലി എഴുന്നള്ളത്തും മറ്റു ക്ഷേത്രങ്ങളില്‍ നിന്നും കൂടല്‍മാണിക്യത്തെ വ്യത്യസ്തമാക്കുന്നു. നാളെ രാത്രി 8.10 നും 8.40 നും മധ്യേ ഉത്സവത്തിനു കൊടികയറും. ഒന്നാം ഉത്സവദിനമായ മെയ് 13 നു കൊടിപ്പുറത്ത് വിളക്കാഘോഷത്തിനു ഭഗവാന്‍ ആദ്യമായി പുറത്തേക്കെഴുന്നള്ളും. തുടര്‍ന്ന് ആസ്വാദരകരെ എട്ടു ദിനരാത്രങ്ങളോളം ആനന്ദലഹരിയിലാടിക്കുന്ന പഞ്ചാരിമേളത്തിനു തുടക്കമാവും. രണ്ട് ഉള്ളാനകളടക്കം 17 ഗജവീരന്മാര്‍ രാവിലെ ശീവേലിക്കും വൈകീട്ട് വിളക്കിനും പങ്കെടുക്കും. കൊടിയേറ്റം നടക്കുന്നതോടെ തന്നെ ക്ഷേത്രത്തിനകത്തു വാതില്‍ മാടത്തില്‍ മിഴാവൊലിയുടെ ചാക്യാര്‍കൂത്ത് ആരംഭിക്കും. കൊടിപ്പുറത്ത് വിളക്കിന്റെ അന്ന് വൈകീട്ട് സന്ധ്യാവേലപന്തലില്‍ നാഗസ്വരവും മദ്ദളപറ്റും കുഴല്‍പറ്റും വടക്കുപടിഞ്ഞാറെ പ്രദക്ഷിണ വഴിയില്‍ പാഠകവും പടിഞ്ഞാറെ നടപ്പുരയില്‍ കുറത്തിയാട്ടവും എഴുദിവസവും നടക്കും. ക്ഷേത്രത്തിനകത്ത് വാതില്‍മാടത്തില്‍ ബ്രാഹ്മണിപ്പാട്ടും രാവിലെയും വൈകീട്ടും സോപാനത്ത് അഷ്ടപദിയും അരങ്ങേറും. ക്ഷേത്രത്തിനെ സമ്പൂര്‍ണ പ്രഭാപൂരിതമാക്കുന്ന വലിയവിളക്കാഘോഷം 20 നു നടക്കും. 21 നു പള്ളിവേട്ട ദിനത്തില്‍ രാവിലെ ശീവേലിയോടെ ഉത്സവപാഞ്ചാരിമേളങ്ങള്‍ക്കു സമാപനമാകും. പഞ്ചാരി മേളത്തിനു പത്മശ്രീ പെരുവനം കുട്ടന്‍മാരാര്‍ നേതൃത്വം നല്‍കും. വൈകീട്ട് എട്ടോടെ ക്ഷേത്രമതില്‍ക്കെട്ടിനു പുറത്തേക്കു വരുന്ന ഭഗവാന്‍ നിശബ്ദമായി ഗജവീരന്മാരുടെ അകമ്പടിയോടെ പള്ളിവേട്ട ആല്‍ത്തറയിലേക്കു പള്ളിനായാട്ടിനായി എഴുന്നള്ളും. പള്ളിവേട്ടയ്ക്കുശേഷം പരക്കാട് തങ്കപ്പന്‍ മാരാരുടെ നേതൃത്വത്തില്‍ പഞ്ചവാദ്യവും തുടര്‍ന്നു പാണ്ടിമേളവും നടക്കും. മെയ് 22 നു രാവിലെ എട്ടിനു കൂടപ്പുഴ ആറാട്ടു കടവില്‍ പള്ളിനീരാട്ടനായി ഭഗവാന്‍ മൂന്നു ഗജവീരന്മാരുടെ അകമ്പടിയോടെ യാത്രതിരിക്കും. രാപ്പാളില്‍ ആറാട്ടിനുശേഷം തിരിച്ചെഴുന്നള്ളുന്ന ഭഗവാനെ രാത്രി ഒമ്പതിനു പള്ളിവേട്ട ആല്‍ത്തറയ്ക്കല്‍ നിന്നും പഞ്ചവാദ്യത്തോടെയും തുടര്‍ന്നു പാണ്ടിമേളത്തോടെയും സ്വീകരിച്ചു ക്ഷേത്രത്തിനകത്തു ബാക്കി പ്രദക്ഷിണം പൂര്‍ത്തിയാക്കി ശ്രീലകത്തേക്ക് എഴുന്നള്ളിക്കും. ഇതോടെ 11 ദിവസം നീണ്ടു നില്‍ക്കുന്ന ഉല്‍സവത്തിനു പരിസമാപ്തിയാകും.
About Author
ജന്മനക്ഷത്ര കാണിയ്ക്ക സമാഹരണം 
ക്രൈസ്റ്റ് കോളജില്‍ യാത്രയയപ്പ് സമ്മേളനം 
വാഗ്മിതത്തില്‍ അമ്മന്നൂര്‍ കുട്ടന്‍ ചാക്യാര്‍ കൂത്ത് അവതരിപ്പിച്ചു 
മാപ്രാണം നന്തിക്കര റോഡ് ടാറിടല്‍ പുനരാരംഭിച്ചു 
ഫാ. ജോസ് ചുങ്കന്‍ കലാലയരത്‌ന പുരസ്‌കാരം സമ്മാനിച്ചു 
പൊഞ്ഞനം ഭഗവതി ക്ഷേത്രം പൂരത്തിനു കൊടിയേറ്റി 
