സംസ്ഥാന സര്‍ക്കാരിന്റെ അവാര്‍ഡിന് മങ്ങല്‍ ജനറല്‍ ആശുപത്രിയില്‍ മാലിന്യ കൂമ്പാരം
ഇരിങ്ങാലക്കുട ജനറല്‍ ആശുപത്രിയില്‍ അലക്ഷ്യമായ നിലയില്‍ കൂട്ടിയിട്ടിരിക്കുന്ന മാലിന്യങ്ങള്‍.
ഇരിങ്ങാലക്കുട: ശുചിത്വത്തിനും മാലിന്യ പരിപാലനത്തിനും പരിസ്ഥിതി സൗഹാര്‍ദത്തിനുമായി സംസ്ഥാന സര്‍ക്കാരിന്റെ അവാര്‍ഡുകള്‍ വാരിക്കൂട്ടിയ ഇരിങ്ങാലക്കുട ജനറല്‍ ആശുപത്രിയില്‍ അലക്ഷ്യമായ നിലയില്‍ മാലിന്യ കൂമ്പാരം. ആശുപത്രിയിലുള്ള ഹരിതകര്‍മ സേനയുടെ സംഭരണശാലയ്ക്ക് തൊട്ടരികിലായാണ് മാലിന്യങ്ങള്‍ അലക്ഷ്യമായ രീതിയില്‍ കുന്നുകൂട്ടിയിട്ടിരിക്കുന്നത്. ആശുപത്രി വേസ്റ്റും പ്ലാസ്റ്റിക്കും ഗ്ലൗസും വരെ ഇവിടെ കാണാം. ഒഴിഞ്ഞിരിക്കുന്ന ബക്കറ്റില്‍ കൊതുകുകള്‍ക്ക് പെറ്റു പെരുകാന്‍ പാകത്തില്‍ വെള്ളവുമുണ്ട്.
മാലിന്യ സംഭരണശാലയില്‍ ഗ്ലാസ്, കുപ്പി തുടങ്ങി ഇ-വേസ്റ്റ് മാലിന്യങ്ങളെല്ലാം സംഭരിക്കുന്നതിനും പ്ലാസ്റ്റിക് മാലിന്യം സംഭരിക്കുന്നതിനും പേപ്പര്‍ മാലിന്യം സംഭരിക്കുന്നതിനുമെല്ലാം പ്രത്യേകമായി മുറികളുണ്ട്. ഈ മുറികളെല്ലാം താഴിട്ട് പൂട്ടിയിട്ടുമുണ്ട്. ഇതിന് തൊട്ടടുത്തായി നിര്‍മാണത്തിലിരിക്കുന്ന അമ്മയും കുഞ്ഞും കെട്ടിടത്തിന്റെ സൈഡിലും പുറത്ത് വിരിച്ചിരിക്കുന്ന ടൈലിലുമെല്ലാം മാലിന്യങ്ങള്‍ നിറഞ്ഞു കിടപ്പാണ്. മോര്‍ച്ചറിയുടെ സൈഡിലാകട്ടെ പൊട്ടിയ ക്ലോസറ്റ് വരെ കിടപ്പുണ്ട്.
കഴിഞ്ഞ മാസമാണ് ജനറല്‍ ആശുപത്രി സംസ്ഥാന സര്‍ക്കാരിന്റെ മാലിന്യ പരിപാലനം, ശുചിത്വം, അണുബാധ നിയന്ത്രണം എന്നിവ പ്രോത്സാഹിപ്പിക്കുന്നതിന്റെ ഭാഗമായി നല്‍കുന്ന കായകല്‍പ്പ് അവാര്‍ഡും പരിസ്ഥിതി സൗഹാര്‍ദ അവാര്‍ഡും കരസ്ഥമാക്കിയത്. എറണാകുളം ജനറല്‍ ആശുപ ത്രിയുമായി കായകല്‍പ്പ് അവാര്‍ഡ് പങ്കിട്ട് അവാര്‍ഡ് തുകയായ 25 ലക്ഷം രൂപയും പരിസ്ഥിതി സൗഹാര്‍ദ അവാര്‍ഡ് തുകയായ 10 ലക്ഷം രൂപയും ജനറല്‍ ആശുപത്രി സ്വന്തമാക്കിയിരുന്നു.
ആശുപത്രിയുടെ ശുചീകരണത്തിലും മാലിന്യങ്ങള്‍ കൃത്യമായ ഇടവേളകളില്‍ നീക്കം ചെയ്യുന്നതിനും മുന്‍തൂക്കം നല്‍കി, ക്ലോറിനേഷന്‍ കൃത്യമായ ഇടവേളകളില്‍ നടത്തി അണുനശീകരണം ഉറപ്പു വരുത്തി, പ്രസവ വാര്‍ഡുകളിലും കുട്ടികളുടെ വാര്‍ഡുകളിലും ചുവരുകളെല്ലാം പെയിന്റ് ചെയ്ത് മനോഹരമാക്കി, പ്രസവ വാര്‍ഡില്‍ ശുചിത്വം ഉറപ്പാക്കി, വാര്‍ഡുകളില്‍ മാലിന്യം നിക്ഷേപിക്കുന്നതിന് പ്രത്യേകം ബക്കറ്റുകള്‍ സ്ഥാപിച്ച്, മാലിന്യങ്ങള്‍ തരംതിരിച്ച് മണിക്കൂറുകളുടെ ഇടവേളകളില്‍ വെവ്വേറെ ശേഖരിച്ച് ശുചിത്വവും പരിസ്ഥിതി സൗഹാര്‍ദവും ഉറപ്പുവരുത്താന്‍ ആശുപത്രി അധികൃതര്‍ വിട്ടുവീഴ്ചയില്ലാതെ കാഴ്ചവച്ച പ്രവര്‍ത്തനങ്ങളുടെ അടിസ്ഥാനത്തില്‍ ലഭിച്ച അവാര്‍ഡുകളെ നോക്കുകുത്തിയാക്കിയാണ് ഇപ്പോള്‍ ഇവിടെ മാലിന്യങ്ങള്‍ കിടക്കുന്നത്. ആശുപത്രിയിലെ ഈ മാലിന്യ കാഴ്ചകള്‍ ബന്ധപ്പെട്ട അധികൃതരുടെ കണ്ണില്‍പ്പെടാത്തതാണെങ്കില്‍ സംസ്ഥാന അവാര്‍ഡുകളുടെ തിളക്കത്തിന് ഒട്ടും മങ്ങലേല്‍ക്കാത്ത വിധം മാലിന്യ നിര്‍മാര്‍ജന രീതികള്‍ ഫലപ്രദമായി മുന്നോട്ടു കൊണ്ടുപോകാന്‍ വേണ്ട പ്രവര്‍ത്തനങ്ങള്‍ വീണ്ടും വിട്ടുവീഴ്ച്ചയില്ലാതെ നടപ്പിലാക്കണമെന്നാണ് നാട്ടുകാര്‍ക്ക് പറയാനുള്ളത്.
About Author
യുവതിയെ പിന്തുടര്‍ന്ന് ശല്യം ചെയ്യല്‍; യുവാവായ പിടികിട്ടാപ്പുള്ളിയെ എറണാകുളത്ത് നിന്ന് അറസ്റ്റ് ചെയ്തു 
ക്രൈസ്റ്റ് കോം ക്വിസ്- 2025, ഹൈദരാബാദ് ഉസ്മാനിയ മെഡിക്കല്‍ കോളജിന് ഒന്നാം സ്ഥാനം 
കത്തീഡ്രലില്‍ വിശുദ്ധ കുരിശിന്റെ പുകഴ്ചയുടെ തിരുനാളും കപ്പേളകളുടെ വെഞ്ചരിപ്പുകര്‍മവും 14ന് 
സെന്റ് ജോസഫ്‌സ് കോളജില്‍ ഫിസിക്‌സ് വിഭാഗം ദേശീയ സെമിനാര്‍ 
വല്ലച്ചിറ ക്ഷേത്രത്തില്‍ നിന്നും തിരുവാഭരണങ്ങള്‍ മോഷണം; മുന്‍ പൂജാരിയെ അറസ്റ്റ് ചെയ്തു 
ഓണ്‍ലൈന്‍ ഷെയര്‍ ട്രേഡിംഗിന്റെ മറവില്‍ തട്ടിപ്പ്: പ്രതിയെ കോയമ്പത്തൂരില്‍ നിന്നും പിടികൂടി 
