നിക്ഷേപ തുക തിരികെ ലഭിക്കുവാനായി കരുവന്നൂര്‍ ബാങ്കിനുള്ളില്‍ വയോധികയുടെ കുത്തിയിരുപ്പു സമരം
കരുവന്നൂര്‍ ബാങ്കിനുള്ളില്‍ നിക്ഷേപ തുക തിരികെ ലഭിക്കണെന്നാവശ്യപ്പെട്ട് വയോധികയായ ആനിയമ്മ കുത്തിയിരിക്കുന്നു.
ഇരിങ്ങാലക്കുട: എന്റെ ആറര പവന്‍ സ്വര്‍ണ്ണമാല പണയം വച്ച് ആശുപത്രിയില്‍ ചികില്‍സക്കുള്ള പണം നല്‍കിയിട്ടാണ് ഈ ബാങ്കില്‍ വന്നിരിക്കുന്നത്. നിക്ഷപതുക തിരികെ ലഭിക്കുവാനായി കരുവന്നൂര്‍ ബാങ്കിനുള്ളില്‍ കുത്തിയിരിപ്പ് നടത്തിയ മലപ്പുറം സ്വദേശി കണ്ണന്തറ വീട്ടില്‍ ആനിയമ്മ(79)യുടെ വാക്കുകളാണിത്. ഉദരസംബന്ധമായ അസുഖം മൂലം ഏറെ നാളായി ആശുപത്രിയില്‍ ചികില്‍സയില്‍ കഴിയുകയായിരുന്നു. ആശുപത്രിയില്‍ നിന്നും ഡിസ്ചാര്‍ജ് ആയപ്പോള്‍ ചികില്‍സാചിലവിനുള്ള പണം അടക്കുവാന്‍ കഴിയാതെ വന്നു. ഈ സമയം തന്റെ ആറര പവന്റെ മാല പണയം വച്ച് ആ തുക ആശുപത്രിയില്‍ അടച്ച ശേഷമാണ് ഡിസ്ചാര്‍ജ് ആയത്. പരിന്തല്‍മണ്ണ ഇഎംഎസ് ആശുപത്രിയിലും എംഇഎസ് മെഡിക്കല്‍ കോളജിലുമായിരുന്നു ചികില്‍സ.
മലപ്പുറം പെരിന്തല്‍മണ്ണ അങ്ങാടിപ്പുറം സ്വദേശി ആനിയമ്മയുടെ ഭര്‍ത്താവ് റോബിന്‍ ഹൃദ്രോഗം മൂലം 20 വര്‍ഷം മുമ്പ് മരണപ്പെട്ടിരുന്നു. സുജ, സുശ എന്നീ രണ്ട് പെണ്‍മക്കളാണ് ആനിയമ്മക്കുള്ളത്. സുശയെ മാപ്രാണം സ്വദേശി വടക്കേത്തല വീട്ടില്‍ ജോഷിയാണ് വിവാഹം ചെയ്തിരിക്കുന്നത്. സ്വന്തമായി തയ്യല്‍പണി ചെയ്തു സമ്പാദിച്ച തുകയാണ് കരുവന്നൂര്‍ ബാങ്കില്‍ നിക്ഷേപിച്ചത്. 13,65,250 രൂപയാണ് നിക്ഷേപതുകയായി ബാങ്കില്‍ നിന്നും തിരികെ ലഭിക്കാനുള്ളത്. ഇന്നലെ രാവിലെ പത്തരയോടെ ബാങ്കിലെത്തിയെങ്കിലും രണ്ട് ലക്ഷം രൂപ നല്‍കാമെന്നായിരുന്നു അഡ്മിനിസ്‌ട്രേറ്റര്‍ അറിയിച്ചത്. എന്നാല്‍ ആശുപത്രിയില്‍ പണമടക്കാനായി പണയം വച്ച തന്റെ മാല തിരികെ ലഭിക്കുന്നതിന് അഞ്ച് ലക്ഷം രൂപയെങ്കിലും വേണമെന്നും ആ തുക ലഭിക്കാതെ ബാങ്കില്‍ നിന്നും തിരികെ പോകില്ലെന്നും ആനിയമ്മ പറഞ്ഞു.
ബാങ്കിലെ ഓഫീസ് സമയം കഴിഞ്ഞപ്പോള്‍ വൃദ്ധയായ ആനിയമ്മയെ തനിച്ചാക്കി ജീവനക്കാര്‍ ഓഫീസ് വിടുകയായിരുന്നു. ഏറെ നേരം കഴിഞ്ഞപ്പോള്‍ മരുമകന്‍ ജോഷി ബാങ്കിലെത്തി. എന്നാല്‍ ഏഴരയോടെ മരുമകനായ ജോഷി അമ്മക്ക് ചായ വാങ്ങാനായി പുറത്തേക്ക് പോയ സമയം പോലീസ് സ്ഥലത്തെത്തി അമ്മയെ ബാങ്കില്‍ നിന്നും പുറത്തിറക്കി ഷട്ടര്‍ ഇടുകയായിരുന്നു. നിക്ഷേപപണം തിരികെ ലഭിക്കും വരെ പ്രതിഷേധം തുടരുമെന്നു ആനിയമ്മയും മരുമകന്‍ ജോഷിയും അറിയിച്ചു. ബാങ്കില്‍ നിന്നും സാധ്യമായതെല്ലാം ചെയ്യുമെന്നും ഇപ്പോള്‍ രണ്ട് ലക്ഷം രൂപ നല്‍കുമെന്നും ബാക്കി തുക ഒന്നിടവിട്ട മാസങ്ങളില്‍ ഗഡുക്കളായി ആനിയമ്മയടെ ബാങക് അകൗണ്ടിലേക്ക് ട്രാന്‍സ്ഫര്‍ ചെയ്യുമെന്നും ബാങ്ക് അധികൃതര്‍ പറഞ്ഞു.
About Author
നഗരസഭക്കെതിരെയുള്ള വ്യാജ പ്രചാരണം -മന്ത്രി ബിന്ദു മാപ്പു പറയണമെന്ന് യുഡിഎഫ് 
ഠാണ- ചന്തക്കുന്ന് റോഡ് വികസനം- വ്യാപാരികള്‍ പ്രതിഷേധ ധര്‍ണ്ണ നടത്തി 
വി.എസ്. അച്യുതാനന്ദന് ഇരിങ്ങാലക്കുടയുടെ പ്രണാമം 
വീട്ടിലേക്ക് അതിക്രമിച്ചുകയറി യുവാവിനെയും ജീവിത പങ്കാളിയെയും ആക്രമിച്ച കേസില്‍ അറസ്റ്റ് 
വെസ്റ്റ് ലയണ്‍സ് ക്ലബ്ബിന്റെ സര്‍വീസ് പദ്ധതികളുടെ ഉദ്ഘാടനം നിര്‍വഹിച്ചു 
ക്രൈസ്റ്റ് കോളജ് എന്‍എസ്എസ് യൂണിറ്റുകള്‍ പരിസ്ഥിതി സംരക്ഷണ സന്ദേശം പകര്‍ന്ന് ചിമ്മിനിയില്‍ 
